“Amerikanët do t’i bëjnë ndeshjet në 4 pjesë për reklamat”, si Maradona parashikoi 8 vite më parë ç’do të ndodhte në Kupën e Botës 2026

Diego Armando Maradona kishte parashikuar që në vitin 2018 se si do të dukej Kupa e Botës 2026, e organizuar nga Shtetet e Bashkuara, Meksika dhe Kanadaja.

Në një intervistë të asaj kohe, legjenda argjentinase u shpreh me humor, por edhe me nota kritike, se futbolli do të përshtatej gjithnjë e më shumë me kërkesat televizive dhe reklamat.

"Amerikanët duan katër pjesë për reklamat", deklaronte Maradona.

Sot, kjo deklaratë është rikthyer në qendër të vëmendjes, pasi ndryshimet në kohëzgjatjen efektive të ndeshjeve dhe minutat e shumta shtesë kanë bërë që shumë tifozë ta konsiderojnë parashikimin e tij si të realizuar.

Maradona shprehej se nuk e pëlqente këtë drejtim që po merrte futbolli.

"Nuk më pëlqen, nuk ka pasion. Kanadezët mund të jenë skiatorë të mirë, çfarëdo qoftë, dhe amerikanët do të donin të luanin katër pjesë nga 25 minuta për reklamat. Do të na duhet të luajmë 100 minuta", thoshte ai duke qeshur.

Në të njëjtën intervistë, ai komentoi edhe pritshmëritë për Meksikën në Kupën e Botës.

"Në këtë Botëror, Meksika del në krye, edhe pse nuk e meriton. Në realitet, nëse Meksika fiton dy ndeshje, meksikanët do të mendojnë se do të shkojnë deri në Brazil ose Gjermani, siç bëra unë, por më pas eliminohen", deklaronte Maradona.

Edhe pse komentet e tij ishin të shoqëruara me humor dhe ironi, shumë prej tyre po rikujtohen sot si një paralajmërim për ndikimin gjithnjë e më të madh të interesave komerciale në futbollin modern.