Arritje historike në Detin Baltik/ Notari polak përshkon 160 kilometra nga Suedia në Poloni

Notari polak Bartłomiej Kubkowski ka shkruar historinë duke u bërë personi i parë që përshkon me not distancën prej rreth 160 kilometrash në Detin Baltik, nga Suedia drejt Polonisë.

Kubkowski përfundoi sfidën pas rreth 56 orësh në ujë, duke mbërritur i rraskapitur në plazhin e Dziwnów, në bregdetin verior të Polonisë.

Kjo ishte përpjekja e tij e pestë për të përfunduar itinerarin, pasi në vitin e kaluar u ndal vetëm rreth 11 kilometra larg bregut polak për shkak të lodhjes ekstreme dhe përkeqësimit të motit.

Gjatë gjithë sfidës, notari nuk fjeti dhe u shoqërua nga një varkë mbështetëse që i siguronte ushqim dhe pije, pa pasur të drejtë ta prekte atë.

Përveç arritjes sportive, sfida e Kubkowskit kishte edhe një qëllim bamirës. Deri tani, përmes këtij projekti janë mbledhur mbi 715 mijë zloty, rreth 166 mijë euro, për trajtimin e fëmijëve me kancer.

Arritja e tij vjen pas disa vitesh përpjekjesh dhe përfaqëson një nga sfidat më të jashtëzakonshme të notit në ujëra të hapura.