Barcelona ka planin rezervë nëse dështon transferimi i Julian Alvarezit

Barcelona po bëhet gjithnjë e më pesimiste për transferimin e Julian Alvarezit, pasi Atletico Madridi vazhdon të kundërshtojë largimin e sulmuesit argjentinas drejt rivalit të La Ligës.

Klubi katalunas raportohet se ka paraqitur një ofertë prej 115 milionë dollarësh për Alvarezin, por ende nuk ka marrë përgjigje zyrtare. Nga ana tjetër, Atletico nuk dëshiron ta shesë sulmuesin te Barcelona, pavarësisht dëshirës së lojtarit për të kaluar në “Camp Nou”.

Alvarezi pritet t’i bashkohet përgatitjeve të Atletico Madridit më 10 gusht, ndërsa Barcelona do të vendosë nëse do ta rrisë ofertën për të gjatë kësaj periudhe.

Nëse transferimi dështon, katalunasit mund të marrin një vendim befasues: të mos transferojnë fare një qendërsulmues të ri.

Barcelona ka nevojë për përforcim në sulm pas largimit të Robert Lewandowskit, ndërsa e ardhmja e Ferran Torresit mbetet e paqartë. Megjithatë, drejtuesit besojnë se Anthony Gordon dhe Karim Adeyemi mund të mbulojnë disa role në repartin ofensiv.

Ndërkohë, një tjetër alternativë po fiton pikë. 18-vjeçari Hamza Abdelkarim ka impresionuar gjatë fazës përgatitore dhe shënoi të dy golat e Barcelonës në barazimin 2-2 ndaj Birmingham Cityt.

Paraqitjet e tij kanë bërë që Hansi Flick ta konsiderojë më seriozisht për ekipin e parë, edhe pse në fillim të verës nuk ishte pjesë e planeve kryesore për sezonin e ri.

Barcelona nuk dëshiron të bëjë një transferim vetëm për të plotësuar numrin dhe për këtë arsye Julian Alvarezi mbetet objektivi kryesor. Nëse Atletico vazhdon të refuzojë shitjen, katalunasit mund të zgjedhin një zgjidhje të brendshme dhe t’i besojnë talenteve që kanë në dispozicion.