Cole Palmer humbet Anglinë! Dëmtimi prish rikthimin e sulmuesit te “Tre Luanët”

Cole Palmer humbet rikthimin me Anglinë për shkak të një dëmtimi të lehtë. Sulmuesi i Chelsea-t pritet të mungojë në katër ndeshjet e radhës të “Tre Luanëve”.

Cole Palmer do të mungojë në ndeshjet e ardhshme të Anglisë në Nations League.

Sulmuesi i Chelsea-t pritet të tërhiqet nga grumbullimi për shkak të një dëmtimi të lehtë, duke humbur kështu rikthimin e shumëpritur te “Tre Luanët”.

24-vjeçari ishte rikthyer në listën e trajnerit Thomas Tuchel, pasi ishte lënë jashtë skuadrës së Anglisë për Kupën e Botës.

Vendimi për ta grumbulluar sërish kishte marrë vëmendje të veçantë, ndërsa vetë Tuchel kishte deklaruar se Palmer kishte “diçka për të provuar” dhe se duhej të tregonte në fushë se e meritonte fanellën e kombëtares.

Dëmtimi ndryshon tashmë planet. Palmer pritet të humbasë të gjithë grumbullimin e zgjatur, gjatë të cilit Anglia do të zhvillojë katër ndeshje.

“Tre Luanët” presin Spanjën, kampione të botës, në Wembley më 26 shtator, përpara transfertave ndaj Republikës Çeke më 29 shtator dhe Kroacisë më 3 tetor. Anglia do ta mbyllë këtë seri duke pritur sërish çekët më 6 tetor.

Problemi fizik vjen vetëm pak ditë pasi Palmer luajti 90 minuta në humbjen 3-0 të Chelsea-t ndaj Brentfordit.

Pas verës së lirë për shkak të mungesës në Kupën e Botës, sulmuesi e kishte nisur fuqishëm sezonin. Ai ka qenë titullar në gjashtë nga shtatë ndeshjet e Chelsea-t, duke realizuar katër gola dhe dhënë dy asistime.

Palmer pati probleme të përsëritura në ijë edhe gjatë sezonit të kaluar. Paraqitja e tij e fundit me Anglinë ishte në muajin mars, në humbjen 1-0 në miqësoren ndaj Japonisë.