Detaji që bëri xhiron e rrjetit në lamtumirën e Baresit: Pse gishti i Didas është i deformuar?

Ceremonia mortore e legjendës së Milanit, Franco Baresi, solli emocione të forta për familjen kuqezi. Ish-futbollistë, drejtues dhe tifozë i dhanë lamtumirën një prej ikonave më të mëdha të klubit, ndërsa shumë prej tyre nuk mundën t'i fshehnin lotët.

Mes të pranishmëve ishte edhe ish-portieri brazilian, Nelson Dida, i cili u shfaq dukshëm i prekur gjatë ceremonisë, pavarësisht se nuk kishte luajtur kurrë në të njëjtën skuadër me Baresin. Ashtu si Clarence Seedorf, edhe Dida mbeti i lidhur me Milanin edhe pas përfundimit të karrierës si futbollist.

Megjithatë, përveç emocioneve të tij, një detaj tjetër tërhoqi vëmendjen e tifozëve dhe u përhap me shpejtësi në rrjetet sociale. Në pamjet e publikuara, vihej re se gishti i vogël i dorës së djathtë të Didas është i deformuar, i përkulur pothuajse në kënd të drejtë.

Shkaku nuk lidhet me një dëmtim të vetëm, por me pasojat e viteve të gjata në portë. Sipas raportimeve, deformimi është rezultat i stresit të vazhdueshëm që duart e tij kanë përballuar gjatë karrierës si portier, për shkak të pritjeve të shumta, goditjeve të forta dhe ngarkesës së përhershme në stërvitje e ndeshje.

Për njerëzit e Milanit kjo nuk është një histori e panjohur, por për shumë tifozë detaji u vu re vetëm gjatë ceremonisë së lamtumirës për Baresin. Vetë Dida nuk është përpjekur kurrë ta fshehë këtë deformim, duke e konsideruar atë si një "shenjë" të viteve të sakrificës në futboll.

Gjatë karrierës së tij, braziliani u shndërrua në një nga portierët më të mirë në historinë e Milanit, duke fituar gjithçka me fanellën kuqezi. Ai mbetet një nga figurat më të dashura të klubit, ndërsa deformimi në gisht është një kujtim i përhershëm i çmimit që pagoi për sukseset e arritura në portë.