Dinamo e Zagrebit nxjerr në shitje Arbër Hoxhën, sulmuesit kuqezi i bëhet problem pasaporta

Arbër Hoxha mund të mos jetë pjesë e Dinamo Zagrebit për sezonin e ri. Sulmuesi i Kombëtares shqiptare është nxjerrë në merkato, teksa drejtuesit e klubit kroat po shqyrtojnë mundësinë e shitjes së kartonit të tij.

Sipas raportimeve nga Kroacia, trajneri Mario Kovaçeviç ka aktualisht 27 futbollistë në dispozicion dhe konkurrenca në repartin ofensiv është shtuar ndjeshëm. Me disa lojtarë që mbulojnë krahët e sulmit, Dinamo po mendon të reduktojë organikën dhe një prej emrave që mund të largohet është pikërisht Hoxha.

Klubi nga Zagrebi synon të përfitojë miliona euro nga shitja e sulmuesit shqiptar. Megjithatë, situata nuk është aspak e thjeshtë. Një prej problemeve që mund të kufizojë numrin e klubeve të interesuara është pasaporta shqiptare e Hoxhës, duke ngushtuar rrethin e skuadrave që mund të bëjnë një ofertë konkrete.

Në pjesën më të madhe të Europës, afati i merkatos është mbyllur tashmë, përfshirë edhe pesë ligat më të rëndësishme. Megjithatë, disa tregje janë ende të hapura dhe mund t’i japin Hoxhës një rrugëdalje nga Dinamo e Zagrebit.

Austria, Skocia dhe Katari lejojnë lëvizje deri më 3 shtator, ndërsa në Zvicër merkatoja mbyllet më 9 shtator dhe në Turqi më 11 shtator.

Kështu, e ardhmja e Arbër Hoxhës mbetet në pikëpyetje. Ditët në vijim mund të jenë vendimtare për të ardhmen e sulmuesit shqiptar, me Dinamon e Zagrebit që pret një ofertë të kënaqshme për të bërë lëvizjen e radhës.