Nëna 78-vjeçare e miliarderit Elon Musk, Maye Musk, ka zbuluar se nuk e ka pasur kurrë problem që të jetojë në kushte t&e...
SPORT
Dinamo kërkon fitoren e katërt radhazi ndaj Laçit/ Daja paralajmëron: Duhet të kemi kujdes në tranzicion
PiranjatPërditësimi i fundit 18 Shtator 2026, 13:49
Dinamo synon të vijojë serinë e rezultateve pozitive në Abissnet Superiore, teksa këtë javë përballet me Laçin në “Elbasan Arena”, në kuadër të javës së pestë të kampionatit.
Blutë vijnë në këtë sfidë pas tri fitoreve radhazi dhe me moral të lartë, ndërsa objektivi i skuadrës së Ilir Dajës është ta mbyllë këtë fazë të kampionatit përpara pauzës me një tjetër rezultat pozitiv.
Përballë do të jetë Laçi, i cili gjithashtu po kalon një moment të mirë dhe ka grumbulluar shtatë pikë.
Në prag të sfidës, Daja e ka vlerësuar kundërshtarin dhe ka paralajmëruar një përballje të fortë, ku Dinamo do të kërkojë të imponojë lojën e saj.
“Përpara kemi një ndeshje që do të jetë e bukur dhe shumë e luftuar nga të dyja skuadrat, të cilat vijnë nga një moment pozitiv. Ne kërkojmë vazhdimësinë e rezultateve pozitive, duke qenë se vijmë pas tri fitoreve radhazi, ashtu si edhe Laçi, që nuk është mbrapa, duke parë se ka grumbulluar shtatë pikë”, u shpreh trajneri.
Daja theksoi se skuadra e tij duhet të jetë veçanërisht e kujdesshme në momentet kur Laçi kalon në tranzicion.
“Do të jetë një ndeshje e luftuar në maksimum. Ne do të kërkojmë të imponojmë lojën tonë, por duhet të kemi gjithashtu kujdes me ekuilibrat në prapavijë, sepse Laçi është një skuadër që del mirë në tranzicion”, deklaroi ai.
Trajneri foli edhe për situatën e grupit, duke bërë të ditur se gjatë kësaj jave skuadra nuk ka qenë e plotë për shkak të disa dëmtimeve dhe shqetësimeve muskulore.
“Këtë javë kemi pasur një proces stërvitor gjatë të cilit nuk e kemi pasur të gjithë grupin në dispozicion, për shkak të disa dëmtimeve dhe shqetësimeve muskulore. Megjithatë, besoj se me kontingjentin tashmë të zgjeruar që kemi në dispozicion do të jemi të kompletuar”, tha Daja.
Sipas tij, zgjerimi i grupit i jep stafit teknik më shumë alternativa për menaxhimin e gjendjes fizike të futbollistëve dhe për të bërë rotacionin e nevojshëm.
“Një grup më i zgjeruar na jep mundësinë që t’i rikuperojmë siç duhet lojtarët që nuk do të jenë të pranishëm, ashtu siç na krijon mundësinë të bëjmë edhe rotacion për ndonjë lojtar që nuk ka qenë në gjendjen më të mirë fizike.”
Daja shtoi se Dinamo ka pasur kohën e nevojshme për përgatitjen e sfidës dhe se skuadra do të kërkojë maksimalisht tri pikët.
“Kemi pasur të gjithë kohën e nevojshme në dispozicion për ta përgatitur ndeshjen dhe besoj se nesër do ta vlerësojmë siç duhet Laçin, në mënyrë që të vazhdojmë me rezultatet pozitive.”
Në fund, trajneri i Dinamos iu drejtua edhe tifozëve, duke theksuar rëndësinë e mbështetjes së tyre nga shkallët e stadiumit.
“Prania e tifozëve i jep tjetër bukuri ndeshjes dhe ne kemi gjithmonë nevojë për ta. Besoj se, me këtë start të kampionatit, tifozët tanë do të jenë të pranishëm për të na mbështetur”, u shpreh Daja.
Kjo do të jetë ndeshja e fundit e Dinamos përpara pauzës trejavore të kampionatit, e cila vjen për shkak të angazhimeve të ekipeve kombëtare. Blutë synojnë ta mbyllin këtë periudhë me një tjetër fitore dhe të ruajnë ecurinë pozitive të javëve të fundit.
