Dortmundi arrin marrëveshje për huazimin e yllit të Arsenalit

Ethan Nwaneri është pranë transferimit te Borussia Dortmund, pasi klubi gjerman ka arritur marrëveshje me Arsenalin për huazimin e 19-vjeçarit për një sezon.

Sipas gazetarit Fabrizio Romano, marrëveshja është arritur dhe Nwaneri ka dhënë dritën e gjelbër për transferimin. Sulmuesi anglez pritet të udhëtojë për në Gjermani për t’iu nënshtruar testeve mjekësore dhe për të finalizuar kalimin.

Dortmundi do ta mbulojë tërësisht pagën e lojtarit gjatë periudhës së huazimit.

Klubi gjerman u interesua për Nwanerin pas dëmtimit të Giannis Konstantelias, situatë që krijoi nevojën për një tjetër opsion në repartin ofensiv. Drejtuesit e Dortmundit e shohin huazimin si një mundësi të mirë që talenti anglez të ketë minuta të rregullta në ekipin e parë.

Nwaneri pati vështirësi për të siguruar një vend të rregullt në formacionin e Arsenalit sezonin e kaluar. Ai shënoi dy gola dhe dha një asistim në 12 paraqitje në të gjitha garat, përpara se të huazohej te Marseille, ku regjistroi po ashtu dy gola dhe një asistim në 12 ndeshje.

Megjithatë, sezoni 2024/25 ishte shumë më pozitiv për të riun anglez. Nwaneri realizoi nëntë gola dhe dy asistime në 37 paraqitje, duke bindur Arsenalin t’i ofronte një kontratë të re afatgjatë.

Tani, aventura në Bundesliga pritet t’i japë Nwanerit mundësinë për të luajtur rregullisht dhe për të vazhduar zhvillimin e tij larg presionit për të siguruar menjëherë një vend titullari te Arsenali.