E papritur në merkato/ Arbër Hoxha largohet nga Dinamo Zagreb dhe transferohet në Emiratet e Bashkuara Arabe

Sulmuesi anësor i Kombëtares shqiptare, Arbër Hoxha, pritet të largohet nga Dinamo Zagreb për t’iu bashkuar klubit Al Wahda në Emiratet e Bashkuara Arabe.

Sipas raportimeve të “Tportal”, klubet kanë arritur marrëveshjen për transferimin e Hoxhës, në një operacion që kap vlerën e 2.5 milionë eurove.

Largimi i shqiptarit vjen në mënyrë të papritur, pasi ai ishte titullar vetëm dy ditë më parë në ndeshjen e Dinamo Zagrebit ndaj Hapoel Be’er Sheva.

Marrëveshja mes dy klubeve nuk përfshin vetëm shumën fillestare të transferimit. Dinamo Zagreb do të përfitojë gjithashtu 10% të vlerës së një transferimi të ardhshëm të Hoxhës.

Në kontratë parashikohen edhe bonuse të mundshme, të lidhura me kushte të caktuara të marrëveshjes dhe paraqitjet e futbollistit.

Hoxha, pjesë e Kombëtares shqiptare, pritet të nisë së shpejti një aventurë të re në futbollin e Emirateve të Bashkuara Arabe, ndërsa transferimi te Al Wahda pritet të zyrtarizohet në orët në vijim.