Europa League/ Egnatia-Lillestrom ndahen në barazim, kualifikimi vendoset në Norvegji

Nuk ka fitues në sfidën e parë të ‘play-off’-it të Europa League mes Egnatias dhe Lillestrom.

Në “Arena Egnatia” 90-minutëshi i aktit të parë u mbyll me barazimin 0-0, në një ndeshje ku kampionët e Shqipërisë patën shanset e tyre për shënim, por pa sukses. Tani fati i kësaj përballjeje dhe kualifikimi do të vendoset në sfidën e kthimit që do të luhet pas një jave në Norvegji.

Në “Egnatia Arena” sfida nisi  me një gol për norvegjezët, që shënuan me Gabrielsen në miniutën e 5-të, pas ekzekutimit të një goditje dënimi. Por për fatin e mirë të kampionëve të Shqipërisë, goli u anulua nga sistemi VAR për pozicion jashtë loje.

Pas minutave të para të vështira, Egnatia filloi ta marrë veten dhe nisi të shfaqej në portën e Lillestrom. Sinjalin e parë e dha Adjesa, gjuajtja e të cilit u ndal nga portieri. Pak minuta më vonë po ky futbollist rrezikoi sërish ndërkohë që edhe Albanese pati mundësinë e tij. Pjesa e parë u mbyll me barazimin 0-0.

Në pjesën e dytë Egnatia sërish me Albanesen pati mundësinë e saj për të shënuar, por shansin më të pastër e pati Gruda (70’) që nuk e pati fatin me vetë pasi gjuajtja e tij u ndal nga shtylla.

Ndërsa në minutën e 73-të ishte Egnatia që u ndihmua nga fati, pasi Lillestrom pas një gabimi të portierit Dajsinani iu afrua golit, por Va me portën bosh nuk mundi të shënojë dhe rezultati mbeti 0-0 deri në fund të ndeshjes duke lënë gjithçka të hapur për ndeshjen e kthimit.