Federata Angleze ashpërson dënimet për diskriminimin/ Minimumi 10 ndeshje pezullim

Federata Angleze e Futbollit (FA) ka forcuar rregullat kundër diskriminimit përpara nisjes së sezonit të ri, duke vendosur një pezullim minimal prej 10 ndeshjesh për lojtarët, trajnerët dhe anëtarët e stafit që shpallen fajtorë për shkelje të rënda diskriminuese.

Rregullat e reja përfshijnë diskriminimin për shkak të racës, origjinës etnike, fesë, gjinisë, orientimit seksual apo aftësive të kufizuara. Më parë, dënimet për raste të rënda varionin nga 6 deri në 12 ndeshje pezullim.

Megjithatë, komisionet e pavarura rregullatore do të kenë mundësi të përshtatin dënimin në varësi të rrethanave të rastit. Nëse ka faktorë rëndues, pezullimi mund të jetë edhe më i gjatë.

Një dënim prej 6 ndeshjesh mund të aplikohet vetëm në rastet kur personi pranon fajësinë në fazën më të hershme të procedurës. Ndërsa përsëritësit e shkeljes mund të përballen me pezullime mbi 12 ndeshje, deri edhe me ndalim të përkohshëm nga futbolli në rastet më serioze.

FA ka deklaruar se masat e reja janë pjesë e përpjekjeve për të eliminuar çdo formë diskriminimi nga futbolli anglez. Federata thekson se, pavarësisht progresit të viteve të fundit, sjelljet diskriminuese mbeten ende një problem në sport.