Studentët kanë marshuar sot në rrugët e Tiranës, ndërsa janë ndalur te Fakulteti i Ekonomikut, ku iu kanë bërë...
SPORT
FIFA nxjerr zbuluar “çmendurinë” e merkatos shqiptare, rekord historik transferimesh; dominojnë futbollistët pa kontratë
PiranjatPërditësimi i fundit 3 September 2026, 19:21
Futbolli shqiptar ka përjetuar një nga verërat më të “nxehta” të historisë sa i përket merkatos. Raporti më i fundit i FIFA-s zbulon se klubet shqiptare kanë regjistruar shifra rekord në transferimet ndërkombëtare, si në hyrje, ashtu edhe në dalje të lojtarëve gjatë merkatos së verës 2026.
Të dhënat e analizuara nga “Panorama Sport” i referohen vetëm transferimeve ndërkombëtare, pra lëvizjeve të futbollistëve nga një shtet në tjetrin, dhe jo transferimeve brenda të njëjtës Federatë.
Dhe pikërisht në këtë aspekt, Shqipëria ka vendosur një rekord të ri historik.
Sipas FIFA-s, gjatë verës së vitit 2026, 135 futbollistë kanë kaluar nga kampionate të huaja në futbollin shqiptar. Një shifër që përbën rekordin më të lartë të regjistruar ndonjëherë. Për ta kuptuar përmasën e këtij fluksi, në dy sezonet e mëparshme numri ishte 133 transferime në hyrje.
Por rekordi nuk ndalet këtu.
Edhe transferimet në dalje kanë prekur shifra të paprecedenta. FIFA ka regjistruar 103 futbollistë që janë larguar nga futbolli shqiptar drejt kampionateve të huaja gjatë kësaj vere.
Krahasuar me sezonin e kaluar, rritja është e ndjeshme: rekordi i mëparshëm ishte 78 transferime në dalje, i regjistruar në verën e vitit 2025.
Në total, bëhet fjalë për 238 transferime ndërkombëtare të lidhura me futbollin shqiptar vetëm gjatë merkatos së verës 2026.
Shumica? Lojtarë me parametër zero
Një tjetër detaj interesant që del nga raporti i FIFA-s lidhet me statusin e futbollistëve. Pjesa dërrmuese e këtyre lëvizjeve janë realizuar nga lojtarë që kanë qenë pa kontratë, pra me parametër zero.
Nga 135 transferimet në hyrje, plot 105 futbollistë kanë ardhur në Shqipëri si lojtarë të lirë.
E njëjta tendencë vihet re edhe në dalje. Nga 103 transferimet e regjistruara drejt kampionateve të huaja, 86 kanë qenë futbollistë pa kontratë.
Shifrat e FIFA-s tregojnë kështu një panoramë të qartë: merkatoja shqiptare po përjeton një zgjerim të fortë në qarkullimin ndërkombëtar të futbollistëve, duke thyer rekordet historike si në afrimet nga jashtë, ashtu edhe në eksportin e lojtarëve drejt kampionateve të huaja.
