Fitore me "shije" shqiptare për Bajernin, mesfushori kuqezi merr besimin e Kompanit në miqësore

Bajern Mynih ka vijuar me ritëm pozitiv përgatitjet në Azi, duke siguruar një fitore 2-1 ndaj Aston Vilës në miqësoren e zhvilluar në Hong Kong.

Skuadra gjermane tregoi formë të mirë në prag të nisjes së sezonit të ri, pavarësisht mungesës së disa prej lojtarëve kryesorë.

Bavarezët kaluan në avantazh në pjesën e parë me golin e Kim, pas një paraqitjeje të kontrolluar në fushë. Trajneri Vincent Kompani aktivizoi nga minuta e parë edhe mesfushorin shqiptar, i cili mori rolin e organizatorit në këtë sfidë.

Në pjesën e dytë, Bajerni arriti të dyfishojë rezultatin. Ibrahimoviç shërbeu asistin për Luis Diaz, i cili dërgoi topin në rrjetë dhe i dha skuadrës gjermane më shumë qetësi në lojë.

Aston Vila reagoi në minutat e fundit të takimit, duke ngushtuar diferencën me golin e Zhoao Gomes në minutën e 83-të. Megjithatë, skuadra angleze nuk arriti të shmangte humbjen dhe ndeshja u mbyll me fitoren 2-1 të Bajern Mynihut.

Sfida në Hong Kong ishte një tjetër test për kampionët gjermanë, të cilët po përgatiten për sezonin e ri dhe po provojnë alternativat e tyre në formacion.