Flick vendos për dy talentët e Barcelonës/ Casado dhe Bardghji pranë largimit

Barcelona po shqyrton të ardhmen e Marc Casados dhe Roony Bardghjit, me të dy lojtarët që rrezikojnë të largohen nga “Camp Nou” para mbylljes së afatit kalimtar.

Sipas raportimeve të “The Athletic”, dy talentët pritet të kenë hapësira të kufizuara në planet e Hansi Flick për sezonin 2026/27, duke bërë që klubi të marrë në konsideratë largimin e tyre.

Casado, i cili është rritur si tifoz i Barcelonës, dëshiron të vazhdojë aventurën në klub, por është i vetëdijshëm se drejtuesit janë të gatshëm të shqyrtojnë një ofertë të përshtatshme për të.

Ndërkohë, Barcelona po mendon për një huazim të Roony Bardghjit. Klubi beson se sulmuesi 20-vjeçar do të përfitonte nga një sezon me më shumë minuta dhe përgjegjësi në një skuadër tjetër.

Drejtuesit katalanas po punojnë për të gjetur destinacionet më të përshtatshme për të dy lojtarët, ndërsa vazhdojnë riformatimin e skuadrës para fillimit të sezonit të ri.