Foda flet për Alitin dhe Berishën: Mirënjohje për gjithçka kanë bërë për Kosovën

Përzgjedhësi i Kosovës, Franco Foda, ka dalë në konferencë për media në prag të katër ndeshjeve të radhës në Ligën e Kombeve, ndërsa është ndalur edhe te Fidan Aliti dhe Valon Berisha, dy futbollistë që nuk do të jenë më pjesë e Kombëtares.

Foda ka shprehur mirënjohjen për kontributin e të dy lojtarëve ndër vite, duke vlerësuar rolin e tyre në historinë e përfaqësueses së Kosovës.

“Dua të shpreh falënderimin dhe mirënjohjen time të veçantë për Fidan Alitin, për kontributin dhe paraqitjet e tij të shkëlqyera me fanellën e Kombëtares së Kosovës. Ai ka dhënë shumë për këtë ekip dhe meriton respekt të plotë për gjithçka që ka bërë për Kombëtaren”, deklaroi Foda.

Për Valon Berishën, përzgjedhësi i Kosovës kujtoi edhe golin historik ndaj Finlandës, ndërsa vlerësoi zgjedhjen e tij për të përfaqësuar Kosovën.

“Dua të falënderoj edhe Valon Berishën, i cili ka qenë pjesë e rëndësishme e historisë sonë, duke shënuar golin historik kundër Finlandës. Ai zgjodhi ta përfaqësojë Kosovën, duke lënë Kombëtaren e Norvegjisë, dhe për këtë, si dhe për gjithë kontributin e tij me fanellën tonë, meriton mirënjohjen dhe respektin tonë”, u shpreh Foda.

Ndërkohë, Kosova përballet me një kalendar të ngjeshur, pasi në harkun e vetëm dhjetë ditëve do të zhvillojë katër ndeshje në Ligën e Kombeve. “Dardanët” do të përballen me Irlandën më 24 shtator, Austrinë më 27 shtator, Izraelin më 1 tetor dhe sërish Austrinë më 4 tetor.

Foda ka theksuar se skuadra do të përgatitet maksimalisht për këto sfida, me objektivin për të kërkuar fitoren në çdo ndeshje.