Dy kompanitë e mikrokredive, të cilat aplikojnë interesat më të larta në treg, fituan 11 milionë euro neto vitin e kaluar. ...
SPORT
FORMULA 1/ Katër në 3 gara, Hamilton dhe makthi i penalizimeve
PiranjatPërditësimi i fundit 29 Korrik 2026, 15:43
Një fitore, e para e Ferrarit pas 34 garash, një “pole position” në Sprint, 169 pikë dhe vendi i dytë në renditjen e kampionatit pas 11 garash. Një bilanc aspak i keq për Luis Hamiltonin në pjesën e parë të sezonit në F1.
Por këtij rezultati pozitiv i shtohen edhe katër penalitete të marra në tri garat e fundit. Dhe duke qenë se “Sir” LUis Hamilton është gjithashtu shtatë herë kampion bote, diskutimi mbi vendimet ndaj tij ishte i pashmangshëm. “Gjatë kësaj periudhe më japin penalitete sa herë që munden…”, u shpreh me zhgënjim piloti i Ferrarit pas Çmimit të Madh të Hungarisë, ku u ndëshkua si të shtunën ashtu edhe të dielën.
Por a mund të flitet vërtet për një trajtim të padrejtë ndaj tij? Përgjigjja është jo. Bëhet fjalë për episode shumë të ndryshme nga njëri-tjetri dhe, në disa raste, edhe për situata të pafata. Megjithatë, në një rast të veçantë, atë në Spa, ishte e kuptueshme pse disa u rreshtuan në anën e Hamiltonit.
RASTI I ANGLISË Në Silverston, Hamilton u penalizua me 5 sekonda për një nisje të parakohshme. Makina lëvizi pak çaste përpara fikjes së semaforëve dhe më pas u ndal përsëri. Edhe pse Hamilton pranoi përgjegjësinë për incidentin, ai ngriti çështjen e zbatimit jo gjithmonë të njëjtë të rregullores, duke argumentuar se në të kaluarën lëvizje të ngjashme brenda vendit të nisjes nuk ishin ndëshkuar. Pavarësisht se FIA ka deklaruar se kriteret do të rishikohen në të ardhmen, shkelja teknike mbetet objektive: ishte një gabim i vogël në start. Sado minimal të ishte, sa pak ndikim të kishte në rezultat, ai përsëri ishte një shkelje e rregullave.
RASTI I BELGJIKËS Në Spa, Hamilton u penalizua për kontaktin me Xhorxh Rasëllin në kthesën “Les Combes”, pak pas nisjes së Çmimit të Madh të Belgjikës. Ky ishte episodi më i debatueshëm i gjithë serisë së penaliteteve. Dënimi prej 5 sekondash ndaj Hamiltonit u konsiderua i ashpër nga shumë vëzhgues. Veçanërisht domethënës ishte fakti që vetë Rasëll e cilësoi ngjarjen si një “incident gare”, edhe pse përplasja më pas e detyroi pilotin e Mercedesit të tërhiqej. Vendimi i komisarëve u pa si tepër i rreptë dhe ndoshta u ndikua edhe nga pasoja e kontaktit, pra nga fakti që Rasëll nuk mundi të vazhdonte garën. Disa xhiro më vonë, ndërkohë, të njëjtët komisarë nuk ndërhynë në një incident ndoshta edhe më të dukshëm, ku Sharl Lëklerk u përplas me Oskar Piastrin. Në atë rast, megjithatë, piloti australian nuk pati pasoja dhe vazhdoi garën.
ÇFARË NDODHI NË HUNGARI? Në Budapest erdhën dy penalitetet e fundit. Të shtunën, gjatë pjesës së tretë të kualifikimeve (Q3), Hamilton u ndëshkua me humbje pozicionesh në nisje pasi pengoi Oskar Piastrin, i cili ishte në xhiron e tij të shpejtë. Pengimi ishte i qartë, por u hap një tjetër debat: kujt i takonte përgjegjësia, Hamiltonit apo Ferrarit që nuk e njoftoi në kohë? Përgjigjja nuk është aq e thjeshtë dhe mund të flitet për një përgjegjësi të përbashkët. Megjithatë, për drejtimin e garës kjo nuk ndryshon asgjë, pasi konstatohet një pengim i paligjshëm, piloti duhet të ndëshkohet. Një kampion bote që ka përfunduar i pari xhiron e tij të shpejtë duhet ta dijë se pas tij po afrohen rivalët për tentativën e tyre. Në këtë aspekt, Hamilton pati një mungesë përqendrimi. Por nga ana tjetër, është praktikë e zakonshme që nga muri i bokseve pilotët të paralajmërohen për makinat që vijnë me shpejtësi, pikërisht për të shmangur penalitete të tilla. Pra, edhe Ferrari pati pjesën e vet të përgjegjësisë. Hamilton, megjithatë, nuk kërkoi justifikime: “E marr përgjegjësinë… duhet të kisha parë pasqyrat”, deklaroi ai, edhe pse përmendi një vonesë në komunikimin radio me inxhinierin e tij.
GABIMI ME KUFIZUESIN E SHPEJTËSISË Më pas, gjatë garës, erdhi penaliteti i fundit. Në ndalesën e fundit në bokse, Hamilton mori një dënim prej 5 sekondash pasi tejkaloi limitin e shpejtësisë në “pit lanë” me vetëm 0.1 km/ h: 80.1 km/h në një zonë ku kufiri ishte 80 km/h. Frederik Vasër shpjegoi se Hamilton e kishte çaktivizuar kufizuesin e shpejtësisë një moment para kohe dhe kjo i kushtoi pozicionin ndaj shokut të skuadrës, Sharl Lëklerkut. Pra, nuk bëhet fjalë për ndonjë komplot apo për një seri ndëshkimesh të padrejta. Më shumë është një kombinim gabimesh në ekzekutim, pakujdesish të vogla dhe disa keqkuptime me murin e bokseve. Të gjitha këto janë episode që sipas rregullores mund të ndëshkohen. Është një tjetër dëshmi se në Formula 1, ku gjithçka vendoset në të mijtat e sekondës dhe ku çdo procedurë duhet kryer në mënyrë perfekte, edhe një kampion i nivelit të Hamiltonit nuk mund të lejojë as gabimin më të vogël.
