Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
SPORT
Gimenez në hije te Milani, premtime të mëdha por pa minuta dhe me shumë pikëpyetje
PiranjatPërditësimi i fundit 15 April 2026, 14:04
Të gjithë luajnë, përveç tij. Santiago Gimenez është kthyer në alternativën e fundit te Milani, ndonëse në planet e Masimiliano Alegri ai duhej të ishte një nga armët kryesore për fundin e sezonit.
Megjithatë, ndaj Napolit luajti vetëm gjysmë ore, ndërsa kundër Udinezes nuk u ngrit fare nga stoli, një situatë që nuk premton shumë as për sezonin e ardhshëm. Në raste të tilla është e vështirë të kuptosh nëse bëhet fjalë për bindje reale apo thjesht deklarata publike. Prej më shumë se një muaji, sa herë pyetet për Gimenezin, Alegri e përshkruan si një burim të rëndësishëm për fazën finale të kampionatit.
Në letër, gjithçka dukej gati: një repart sulmues në vështirësi, shokë skuadre me probleme të ndryshme, paqartësi taktike dhe mungesë besimi. Në këtë kontekst, meksikani dukej njeriu ideal për të ringjallur sulmin, më i motivuari pas katër muajsh e gjysmë mungesë dhe një operacioni të rëndë në kavilje që i kushtëzoi sezonin.
Rikthimi që nuk po jep efekt Gimenez mezi priste të rikthehej, madje dëshironte të luante që në derbi, por u kthye dy javë më vonë ndaj Torinos. Disa minuta që lanë përshtypje pozitive, si një frymë e re në një skuadër që po mbahej në këmbë nga golat e Pavloviç. Por vazhdimësia mungoi. Ndryshimi taktik nga dy sulmues në trident nuk funksionoi, rikuperimi i Rafael Leao nuk solli efektin e pritur dhe as ideja për t’i dhënë më shumë hapësirë Gimenezit nuk u konkretizua. Pas paraqitjes së mirë me Torinon, ai pati vetëm gjysmë ore në “Maradona”, në vend të Fylkryg, duke prekur vetëm shtatë topa, ndërsa ndaj Udinezes e ndoqi gjithë ndeshjen nga stoli. Pikërisht ky kontekst ngre shumë pikëpyetje: pse nuk u mor fare në konsideratë në një ndeshje kaq të vështirë? Pse në pjesën e parë u nxeh vetëm Fylkryg? Dhe pse në pjesën e dytë hynë të gjithë përveç tij?
Zgjedhje teknike apo mungesë besimi? Një shpjegim mund të jetë forma fizike dhe minutazhi më i madh i lojtarëve si Fylkryg apo Nkunku. Por ndaj Napolit, gjermani luajti vetëm një pjesë, ndërsa francezi pak më shumë se një çerek ore – minuta që mund t’i kishte marrë edhe Gimenez. Kjo e bën më të besueshme idenë e një zgjedhjeje thjesht teknike. Paradoksi qëndron te fakti se Alegri ka preferuar një lojtar në huazim si Fylkryg, që në fund të sezonit do të largohet, ndërsa Gimenez është një investim i rëndësishëm i klubit (28 milionë euro plus bonuse) dhe deri tani ka realizuar 7 gola në 32 paraqitje. Nëse nuk u aktivizua as kur Milani ishte në disavantazh 2-0 ndaj Udinezes, atëherë kur do të jetë momenti i tij?
E ardhmja në dyshim Aspekti psikologjik ka peshë të madhe, fillimisht vështirësia për të gjetur golin në kampionat, më pas dëmtimi i gjatë dhe tani mungesa e besimit nga trajneri. Një kombinim që ngre pikëpyetje serioze për sezonin e ardhshëm, sidomos duke ditur se klubi pritet të afrojë një tjetër qendërsulmues të nivelit të lartë. Megjithatë, ka ende një dritë në fund të tunelit për Gimenezin, i cili do të ketë mundësinë të luajë një Botëror në vendin e tij. Por para kësaj, duhet t’i japë kuptim këtij fundi sezoni, duke e kthyer në realitet besimin që trajneri vazhdon ta shprehë vetëm me fjalë.
