Goli kundër Norvegjisë, teknologjia shpëton Anglinë

FIFA sqaroi se teknologjia e topit të lidhur (Connected Ball) konfirmoi se nuk kishte asnjë kontakt të topit me kabllon e kamerës në aksionin që çoi te goli i barazimit të Anglisë në ndeshjen çerekfinale ndaj Norvegjisë.

Incidenti ndodhi në fund të pjesës së parë, kur lojtarët norvegjezë protestuan se topi kishte prekur një kabllo të vendosur mbi fushë pas rivënies nga porta të portierit Orjan Nyland.

Sipas rregullave të FIFA-s, nëse topi prek një objekt të jashtëm, loja duhet të ndërpritet dhe të rifillojë me një shkelm ridërgimi.

Megjithatë, arbitri lejoi vijimin e lojës dhe Anglia barazoi rezultatin me golin e Jude Bellingham, pas një aksioni të nisur nga Elliott Anderson dhe të finalizuar pas asistit të Anthony Gordon.

Në një deklaratë, FIFA bëri të ditur se sensori i integruar në top nuk regjistroi asnjë sinjal që të tregonte kontakt me kabllon.

“Përpara golit të Anglisë në minutën 45+2 ndaj Norvegjisë, sensori i Connected Ball nuk regjistroi asnjë ndryshim në prekjen e topit gjatë fluturimit, ndaj nuk ka prova që topi të ketë prekur kabllon ajrore apo të ketë ndryshuar trajektore”, thuhet në reagimin e FIFA-s.

Trajneri i Norvegjisë, Stale Solbakken, protestoi ndaj arbitrit Clément Turpin në pushimin mes pjesëve, ndërsa ish-arbitri i Premier League, Mark Clattenburg, deklaroi se në rast se do të ishte konstatuar kontakti me kabllon, sistemi VAR duhej të kishte ndërhyrë, pasi incidenti ishte pjesë e aksionit që solli golin.

Anglia përmbysi rezultatin dhe fitoi 2-1 pas kohës shtesë, me Jude Bellingham që shënoi golin e fitores, duke siguruar kualifikimin në gjysmëfinalet e Kupës së Botës./ a.jor.