Interi pranë goditjes së madhe, marrëveshje verbale me John Stones për mbrojtjen zikaltër

Interi është shumë pranë transferimit të John Stones. Mbrojtësi anglez 32-vjeçar ka arritur një marrëveshje verbale me klubin zikaltër dhe pritet të bashkohet me skuadrën e Milanos pas largimit me parametra zero nga Manchester City.

Oferta e Interit për Stones parashikon një kontratë dyvjeçare me një pagë rreth 4 milionë euro në sezon. Detajet përfundimtare të marrëveshjes mbeten për t’u përcaktuar, por klubi italian është gati të mbyllë operacionin.

Stones vjen te Interi pas një periudhe të suksesshme te Manchester City, ku u shndërrua në një nga lojtarët më të rëndësishëm të Pep Guardiolës. I rritur te Barnsley dhe i afirmuar te Everton, ai u transferua te City në vitin 2016, duke fituar disa trofe të rëndësishëm, përfshirë gjashtë tituj të Premier League dhe Ligën e Kampionëve në vitin 2023.

Në finalen e Champions League ndaj Interit në Stamboll, Stones ishte pjesë e formacionit të Guardiolës dhe luajti edhe në një rol më të avancuar në mesfushë, një pozicion që e ka provuar disa herë gjatë karrierës së tij.

Te Interi, mbrojtësi anglez pritet të mbushë hapësirën e krijuar në qendër të mbrojtjes pas largimit të Francesco Acerbit. Ai shihet si një alternativë me përvojë për repartin defensiv të skuadrës zikaltër.

Plani i Interit është që Stones të marrë një rol të rëndësishëm në formacion, me Manuel Akanjin që mund të zhvendoset në krahun e djathtë të mbrojtjes, ndërsa Alessandro Bastoni do të vazhdojë të jetë pjesë e titullarëve. Yann Bisseck mbetet një tjetër opsion për repartin.

Ndërkohë, klubi italian po largohet nga pista për Cristian Romero, pasi kërkesat financiare të mbrojtësit argjentinas dhe Tottenhamit konsiderohen shumë të larta.