Ish-kampioni i botës në boks u qëllua për vdekje pranë banesës së tij, policia arreston 4 persona

Katër persona janë arrestuar në Afrikën e Jugut në lidhje me vrasjen e ish-kampionit të botës në boks, Zolani Tete.

42-vjeçari u qëllua për vdekje të premten e kaluar, teksa ndodhej përpara banesës së tij në Mdantsane, në provincën e Kepit Lindor.

Policia konfirmoi arrestimin e katër të dyshuarve, të cilët ndodhen aktualisht në paraburgim. I pari, një 22-vjeçar, u arrestua të shtunën, ndërsa një ditë më pas u vunë në pranga edhe tre persona të tjerë: dy 27-vjeçarë dhe një 28-vjeçar.

Të dyshuarit pritet të dalin përpara Gjykatës së Magjistratëve në Mdantsane, ndërsa autoritetet vijojnë hetimet për zbardhjen e plotë të ngjarjes.

Një tjetër 30-vjeçar, i cili ishte arrestuar të shtunën, është liruar më pas dhe po konsiderohet si dëshmitar i mundshëm. Deri tani, policia nuk ka bërë të ditur motivin e vrasjes.

Zolani Tete zhvilloi një karrierë të suksesshme profesioniste nga viti 2006 deri në vitin 2022. Ai u shpall kampion bote fillimisht në kategorinë supermizë dhe më pas në peshën gjel.

Në vitin 2017, Tete hyri edhe në librin e rekordeve “Guinness”, pasi realizoi nokautin më të shpejtë në historinë e një dueli për titull bote.