Juventusi kërkon portier të ri/ Gabimet e Di Gregorios përshpejtojnë lëvizjet, në listë Vicario, Suzuki dhe Trubin

Juventusi po përshpejton kërkimet për një portier të ri titullar, ndërsa e ardhmja e Michele Di Gregorios në portën bardhezi po vihet gjithnjë e më shumë në diskutim.

Paraqitja e portierit italian në ndeshjen miqësore ndaj Interit, të humbur 2-1, ka shtuar shqetësimet te drejtuesit e klubit. Di Gregorio pati përgjegjësi në të dy golat e pësuar, me gabimin në golin e dytë që tërhoqi veçanërisht vëmendjen.

Problemet në portë nuk janë të reja për Juventusin. Gabimet e përsëritura gjatë muajve të fundit kanë bërë që klubi të shqyrtojë seriozisht mundësinë e një ndryshimi në këtë repart, ndërsa koha në dispozicion përpara fillimit të sezonit po shkurtohet.

Në krye të listës së dëshirave të Juventusit është Guglielmo Vicario, portieri 29-vjeçar i Tottenhamit. Italiani konsiderohet një nga alternativat kryesore për të marrë vendin e titullarit në Torino.

Një tjetër emër që po ndiqet nga drejtuesit bardhezi është Zion Suzuki. Portieri japonez 23-vjeçar është gjithashtu në listën e kandidatëve për portën e Juventusit.

Së fundmi, në radar është shtuar edhe Anatoliy Trubin, portieri i Benficës, duke e çuar në tre numrin e alternativave kryesore që po monitorohen nga klubi.

Vendimi përfundimtar nuk pritet të përcaktohet vetëm nga aspekti sportiv. Kushtet ekonomike të operacionit, kostoja e transferimit dhe mundësia për të arritur një marrëveshje me klubet përkatëse do të kenë peshë në zgjedhjen e Juventusit.

Me merkato ende të hapur, drejtuesit bardhezi duhet të vendosin nëse do t’i besojnë sërish Di Gregorios apo do të investojnë për një portier të ri titullar.