Evis Sala ka zbuluar arsyet e dorëheqjes si ministre e Shëndetësisë dhe Mirëqenies Sociale. Në një reagim në rrjete so...
SPORT
“Kambanat e alarmit” për klubin e Kategorisë së Parë, FIFA ende mban “peng” merkaton
PiranjatPërditësimi i fundit 2 Shtator 2026, 14:12
Dritarja e hyrje-daljeve gjatë merkatos së verës konsiderohet tashmë e mbyllur si procesi bazë për klubet e Kategorisë së Parë. Megjithatë, skuadrat që kanë lënë vende bosh në organikë mund t’i plotësojnë ato gjatë sezonit, duke afruar futbollistë që pas përfundimit të edicionit të kaluar kanë mbetur pa kontratë dhe janë aktualisht lojtarë të lirë.
Por, ndërsa pjesa më e madhe e klubeve kanë mbyllur përgatitjet dhe kanë kompletuar grupet për sezonin e ri, një situatë e veçantë vazhdon të shqetësojë Kastriotin. Vera ka qenë problematike për disa klube shqiptare, të cilat janë përballur me bllokime të merkatos nga FIFA për shkak të detyrimeve financiare, borxheve apo çështjeve të pambyllura me futbollistë dhe dokumentacionit përkatës. Pothuajse të gjitha klubet shqiptare që u përballën me këtë problem kanë arritur ta zgjidhin ngërçin dhe të heqin bllokimin në sistemin e FIFA-s. Përjashtim bën Kastrioti. Deri mbrëmjen e djeshme, klubi krutan vijonte të figuronte në sistemin e FIFA-s me merkaton të bllokuar.
Bëhet fjalë për tri çështje ende për t’u zgjidhur, të cilat mbajnë pezull situatën e klubit në prag të startit të kampionatit. Problemi bëhet edhe më shqetësues për shkak të afërsisë së ndeshjes së parë. Kastrioti e nis sezonin më 6 shtator, në transfertë ndaj Burrelit, në një përballje që pritet me interes edhe për shkak të rivalitetit mes dy skuadrave. Nëse bllokimi nuk zgjidhet në kohë, krutanët mund të përballen me vështirësi serioze për të hedhur në fushë kontingjentin që kanë ndërtuar gjatë kësaj vere. Pra, nuk bëhet fjalë vetëm për një problem administrativ apo financiar, por për një çështje që mund të ndikojë drejtpërdrejt në startin e kampionatit. Një kambanë alarmi për Kastriotin, por edhe një situatë që nuk është aspak e mirë për vetë kampionatin, nëse klubi nuk arrin ta zgjidhë ngërçin përpara ndeshjes së parë.
Precedentet në start- Precedentët në futbollin shqiptar janë ende të freskët. Bllokimet e merkatos nga FIFA kanë detyruar edhe klube të tjera të nisin kompeticionet me probleme në kontingjent. Vllaznia u përball me mungesa në aventurën europiane në Ligën e Konferencës, ndërsa Skënderbeu dhe Tirana, për shkak të pamundësisë për të regjistruar lojtarët e afruar, u detyruan të mbështeteshin ndjeshëm te futbollistët e rinj në javën e parë të kampionatit të Kategorisë Superiore. Në kampin krutan, ndërkohë, puna nuk është ndalur. Nën drejtimin e trajnerit Ramazan Ndreu, skuadra ka vijuar përgatitjet për sezonin e ri dhe është munduar të jetë gati për sfidën e parë. Megjithatë, në horizont mbetet një pikëpyetje e madhe: Me çfarë kontingjenti do të zbresë Kastrioti në fushë në transfertën e Burrelit? Kjo është pyetja që kërkon përgjigje në ditët e fundit para startit.
