Kampionët europianë bëjnë gati ofertën për talentin e Barcelonës, katalanasit të bindur për të mos e shitur

Aston Villa ka vendosur të provojë një nga operacionet më të bujshme të merkatos, duke synuar talentin e Barcelonës, Marc Bernal.

Klubi anglez po përgatit një ofertë prej 30 milionë paundësh për mesfushorin 19-vjeçar, i cili ka shpërthyer gjatë sezonit 2025-26 dhe është konsideruar një nga diamantët e rinj të akademisë së famshme La Masia.

Bernal pati një sezon të jashtëzakonshëm me fanellën e Barcelonës, duke luajtur 33 ndeshje në të gjitha kompeticionet dhe duke shënuar pesë gola, duke fituar besimin e trajnerit Hansi Flick.

Tekniku gjerman e sheh spanjollin si një pjesë të rëndësishme të së ardhmes së klubit katalanas, ndërsa Barcelona e ka cilësuar lojtarin si “të paprekshëm” në merkato.

Megjithatë, kjo nuk e ka ndalur Aston Villën. Trajneri Unai Emery është një admirues i madh i Bernalit dhe raportohet se ka kërkuar nga drejtuesit e klubit të bëjnë një përpjekje për ta transferuar në Premier League.

Sipas mediave angleze, Villa po përgatit ofertën zyrtare prej 30 milionë paundësh, ndërsa klubi anglez shpreson të bindë Barcelonën për një marrëveshje.

Por katalanasit kanë refuzuar më parë oferta rreth 25 milionë paundëve, pasi besojnë se cilësitë e Bernalit janë të vështira për t’u zëvendësuar në treg.

Interes për mesfushorin e ri kanë shfaqur edhe disa klube të mëdha europiane. Manchester City ka bërë një kërkesë për informacion, por u njoftua se lojtari nuk është në shitje “në rrethanat aktuale”.

Gjithashtu, Bernal monitorohet nga Arsenali, Chelsea, Manchester United dhe Atletico Madrid.

Arsenali po e ndjek prej kohësh, pasi Mikel Arteta kërkon më shumë alternativa në mesfushë, ndërsa United ka dërguar skautë për të vëzhguar progresin e tij.

Marc Bernal u bashkua me akademinë e Barcelonës, La Masia, që në moshën gjashtëvjeçare dhe është rritur në të njëjtin brez me yje si Lamine Yamal dhe Pau Cubarsi.

Aston Villa tani shpreson që oferta prej 30 milionë paundësh të jetë e mjaftueshme për të tunduar Barcelonën, por klubi spanjoll duket i vendosur të mbajë një nga talentet më premtues të brezit të ri.