16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
SPORT
Kane për Topin e Artë/ Hoeness kritikon Messin dhe Mbappen
PiranjatPërditësimi i fundit 17 September 2026, 08:12
Uli Hoeness ka dalë hapur në mbështetje të Harry Kane për fitimin e Topit të Artë 2026. Presidenti nderi i Bayern Munichut e cilëson sezonin e sulmuesit anglez si të jashtëzakonshëm dhe beson se ai e meriton trofeun individual.
“Ai absolutisht e meriton. Dhe shpresoj që ta fitojë. Harry Kane ka pasur një sezon të jashtëzakonshëm në të gjitha garat. Nëse nuk e meriton këtë vit, atëherë kur do ta meritojë?”, deklaroi Hoeness.
Megjithatë, 74-vjeçari nuk u ndal te Kane, por komentoi edhe disa prej emrave të tjerë që janë në garë për çmimin, mes tyre Lionel Messi dhe Kylian Mbappe.
Për Messin, Hoeness u shpreh: “Mendoj se t’ia japësh Messit Topin e Artë për herë të pestë do të ishte marrëzi”, duke iu referuar faktit se argjentinasi ka fituar tashmë tetë herë këtë trofe.
Sa i përket Mbappes, Hoeness vuri theksin te mungesa e trofeve të Real Madridit gjatë sezonit të kaluar.
“Ata nuk fituan asnjë trofe, ndërsa ne fituam dy”, tha ai.
Mbappe, megjithatë, e ka mbrojtur kandidaturën e tij duke theksuar statistikat individuale. Sulmuesi francez shënoi 25 gola në La Liga, 15 në Champions League dhe ishte golashënuesi më i mirë i Kupës së Botës, ndërsa Real Madridi nuk fitoi një trofe madhor.
Topi i Artë 2026 do të dorëzohet më 26 tetor në Londër, ndërsa gara këtë vit përfshin disa kandidatura të forta, mes tyre Kane, Mbappe, Lionel Messi, Lamine Yamal, Rodri dhe Fabián Ruiz.
Në të njëjtën kohë, Hoeness foli edhe për të ardhmen e Kane te Bayern Munich. Ai konfirmoi se nuk është i përfshirë drejtpërdrejt në negociatat për kontratën e sulmuesit anglez, pasi bisedimet po zhvillohen nga drejtori ekzekutiv Jan-Christian Dreesen.
“Nuk kam nevojë t’i them vazhdimisht se çfarë mendoj, sepse ai e di tashmë se çfarë mendoj. Ata janë në bisedime. Do të shohim se çfarë do të ndodhë”, përfundoi Hoeness.
