Policia e Fierit ka vënë në pranga, dajën e deputetes së PS, Zegjine Çaushi, pasi Bledar Bakaj dyshohet se plagosi me drap&eum...
SPORT
Kaos në Kurbin/ Vllaznia mbetet me 10 lojtarë, arbitri zbraz tribunën dhe Laçi merr 3 pikët
PiranjatPërditësimi i fundit 14 Shtator 2026, 08:27
Laçi ka mposhtur Vllazninë 2-0 në një derbi të tensionuar në Kurbin, ku ndeshja u ndërpre për shkak të incidenteve në tribuna dhe përfundoi pas plot 110 minutash lojë.
Kuqeblutë mbetën me 10 lojtarë, ndërsa arbitri Kreshnik Cjapi urdhëroi zbrazjen e një sektori të stadiumit përpara rifillimit të takimit.
Ndeshja nisi me ritëm të lartë, me Vllazninë që krijoi rrezik që në minutën e parë përmes Mustës. Shkodranët patën më shumë kontroll të topit, ndërsa Laçi kërkoi hapësirat në kundërsulm.
Tensioni u shfaq që në pjesën e parë, kur një përplasje në fushë përfshiu edhe pankinat dhe loja u ndërpre për rreth dy minuta.
Pjesa e parë u mbyll pa gola, por ritmi dhe tensioni u rritën pas pushimit. Në minutën e 50-të, Laçi gjeti golin e avantazhit. Traore zbriti shpejt dhe pas aksionit topi përfundoi te Cena, i cili me një goditje të saktë mposhti portierin Avram për 1-0.
Momenti që ndryshoi ndeshjen erdhi në minutën e 71-të. Mehmeti i Vllaznisë u ndëshkua me karton të kuq të drejtpërdrejtë, vendim që solli protesta nga lojtarët shkodranë dhe drejtori sportiv Vioresin Sinani. Situata u tensionua më tej kur nga tribuna u hodh një send në drejtim të fushës.
Arbitri Kreshnik Cjapi ndërpreu ndeshjen dhe kërkoi që sektori problematik të boshatisej plotësisht përpara se loja të vazhdonte. Pas rreth 11 minutash ndërprerje, futbollistët u rikthyen në fushë dhe takimi rifilloi në minutën e 88-të.
Por Laçi nuk vonoi të godiste sërish. Vetëm pak çaste pas rifillimit, një harkim i Azizit gjeti Traoren në shtyllën e dytë dhe sulmuesi realizoi golin e dytë në minutën e 89-të, duke i dhënë skuadrës vendase avantazhin 2-0.
Për shkak të ndërprerjes së gjatë, u akorduan 19 minuta shtesë, duke e çuar kohën totale të ndeshjes në rreth 110 minuta. Vllaznia pati një mundësi të artë me Balajn në minutën e 90’+4, por ai nuk arriti të shënonte përballë portierit Guri.
Në fund, Laçi mori tri pikët në një nga ndeshjet më të tensionuara të javës së katërt të Abissnet Superiore, ndërsa Vllaznia u largua nga Kurbin pa pikë dhe me një lojtar më pak.
