16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
SPORT
Kategoria e Parë nis me surpriza/ Kukësi bind ndaj Besëlidhjes, Bylisi dhe Pogradeci ndalen në start
PiranjatPërditësimi i fundit 5 September 2026, 21:20
Sezoni i ri i Kategorisë së Parë ka nisur me rezultate interesante në tri ndeshjet e para.
Kukësi e nisi kampionatin me fitore ndaj Besëlidhjes, ndërsa Bylisi dhe Pogradeci nuk arritën të marrin më shumë se nga një pikë në sfidat e tyre të para.
Kukësi fitoi 2-0 ndaj Besëlidhjes, duke e nisur në mënyrën më të mirë sezonin.
Verilindorët e zgjidhën ndeshjen që në pjesën e parë, me Demirçanin që shënoi në minutën e 2-të dhe Pjeshkën që dyfishoi rezultatin në minutën e 17-të.
Besëlidhja, që rikthehet në Kategorinë e Parë pas një sezoni në nivelin e dytë, nuk arriti të reagojë dhe e mbylli takimin pa gol.
Në Ballsh, Bylisi nuk shkoi më shumë se një barazim 1-1 ndaj Sopotit. Skuadra vendase, që këtë sezon vjen nga Kategoria Superiore, kaloi në avantazh në minutën e 75-të me Eminin, i cili realizoi nga pika e bardhë.
Sopoti, që është ngjitur këtë sezon nga Kategoria e Dytë, gjeti barazimin në minutën e pestë shtesë. Atanda goditi nga distanca dhe realizoi një gol që i dha skuadrës së tij një pikë në transfertë.
Edhe Pogradeci, një nga skuadrat që synon ngjitjen në elitë, e nisi sezonin me barazim. Liqenorët u përballën me Ilirinë në Fushë-Krujë, në një ndeshje që përfundoi 0-0.
Iliria pati disa mundësi për të shënuar, por nuk arriti të gjejë rrugën e rrjetës. Pogradeci gjithashtu nuk arriti të konkretizojë rastet e krijuara dhe të dyja skuadrat u detyruan të kënaqen me nga një pikë në startin e kampionatit.
Kështu, pas ndeshjeve të para, Kukësi merr tri pikët, ndërsa Bylisi, Sopoti, Iliria dhe Pogradeci nisin sezonin me nga një pikë.
