“Londër, ja ku po vij”/ Agjenti i Viniciusit ndez zërat për një transferim te Arsenali

Agjenti i Vinicius Junior ka nxitur spekulimet për një transferim të mundshëm të yllit brazilian te Arsenali, pas një postimi të bërë nga Londra.

Michael Yormark, presidenti i agjencisë që përfaqëson Viniciusin, publikoi një fotografi nga aeroporti Heathrow, duke shkruar: “Londër, ja ku po vij. Le të shkojmë!”.

Postimi vjen në një moment kur interesimi i Arsenalit për sulmuesin e Real Madridit është përfolur gjithnjë e më shumë.

Sipas raportimeve, Mikel Arteta e sheh Viniciusin si një përforcim të rëndësishëm dhe i ka premtuar një rol qendror në projektin e tij nëse braziliani transferohet në “Emirates”.

E ardhmja e Viniciusit te Real Madridi mbetet e paqartë, pasi kontrata e tij skadon në qershor të vitit 2027 dhe palët ende nuk kanë arritur marrëveshje për rinovim.

Nëse situata nuk zgjidhet, klubi spanjoll mund të shqyrtojë shitjen e tij gjatë kësaj vere për të shmangur rrezikun e humbjes së lojtarit pa përfituar financiarisht.

Vizita e agjentit në Londër ka shtuar edhe më shumë pikëpyetjet, ndërsa mbetet për t’u parë nëse bëhet fjalë vetëm për një vizitë pune apo për një hap konkret drejt një transferimi të bujshëm në Premier League.