Manchester City nuk fal as në transfertë/ “Qytetarët” mposhtin 4-1 Crystal Palace dhe marrin kreun

Manchester City ka marrë fitoren e dytë radhazi në startin e sezonit të ri të Premier League, pasi mposhti 4-1 Crystal Palace në transfertë, në stadiumin “Selhurst Park” të Londrës.

“Qytetarët” e nisën ndeshjen në avantazh pas 17 minutash lojë. Një krosim i Semenyos gjeti Erling Haalandin, i cili u shkëput në ajër dhe me kokë mposhti portierin Henderson.

Crystal Palace u përpoq të reagonte, por City e kontrolloi ndeshjen dhe në minutën e 54-t gjeti golin e dytë. Rayan Cherki përfitoi nga aksioni dhe dërgoi topin në rrjetë për 2-0.

Dy minuta më vonë, vendasit arritën të shkurtonin diferencën, por goli erdhi pas një autogoli të portierit Donnarumma. Pas një goditjeje dënimi, topi u përplas fillimisht në shtyllë dhe më pas në shpinën e portierit të Cityt, duke përfunduar në rrjetë.

Por reagimi i Manchester Cityt ishte i menjëhershëm. Vetëm tre minuta më vonë, Cherki shënoi sërish, këtë herë pas asistit të Gvardiolit, duke rikthyer avantazhin e dyfishtë për skuadrën e tij.

Në minutat e fundit erdhi edhe goli i katërt. Erling Haaland shënoi sërish dhe vulosi fitoren 4-1 të Manchester Cityt në “Selhurst Park”.

Pas suksesit në javën e parë ndaj Bournemouth, City merr edhe tri pikët e radhës dhe shkon në kuotën e 6 pikëve pas dy javësh, duke mbajtur për momentin kreun e Premier League.

Crystal Palace, ndërkohë, nuk arrin të marrë pikë në shtëpi përballë një Manchester City që e mbylli sfidën me katër gola.