L
Një plagosje me thikë ka ndodhur rreth mesditës në Durrës, në zonën e Shkozetit. Një i ri, rreth 25 vjeç, &eum...
SPORT
Manovrat e merkatos nisin nga Bajerni, Juventusi fillon të ndërtojë ekipin sipas dëshirave të Spaletit
PiranjatPërditësimi i fundit 14 Prill 2026, 14:34
Luçiano Spaleti po shtyn për të punuar sërish me Kim Min-jae pas eksperiencës së tyre te Napoli, dhe tashmë po qartësohen hapat e negociatave.
Juventusi mbetet shumë aktiv në merkato për sezonin e ardhshëm. Drejtuesit e klubit nga “Corso Galileo Ferraris” duan të ndërtojnë një skuadër të nivelit të lartë dhe t’i japin Spaletit përforcime cilësore për të qenë protagonist si në Serie A, ashtu edhe në Champions League (nëse sigurohet kualifikimi). Kim Min-jae, mbrojtësi qendror i lindur në vitin 1996 që aktivizohet te Bajerni i Mynihut dhe përfaqëson Korenë e Jugut, është objektivi kryesor. Ai ka punuar më parë me Spaletin te Napoli, ku së bashku fituan edhe “Scudetton”.
Sipas ekspertit të merkatos Fabrizio Romano, vetë Spaleti mund të ndërhyjë personalisht për ta bindur lojtarin të transferohet në Torino. Operacioni është i vështirë, por jo i pamundur, dhe shumë do të varet nga kërkesat e Bajerni i Munihut. Megjithatë, Juventusi është i vendosur të provojë gjithçka për ta sjellë Kimin nën urdhrat e Spaletit në sezonin e ardhshëm.
MAMADOU SANGARE – Juventusi fitoi në Bergamo ndaj Atalantës dhe përkohësisht kalon Komon në vendin e katërt në renditje, vendi i fundit që të çon në Champions League sezonin e ardhshëm. Ecuria në kampionat do të përcaktojë edhe strategjinë e merkatos së bardhezinjve, por drejtuesit tashmë po punojnë për të shfrytëzuar çdo mundësi të tregut.
Një nga emrat që ka hyrë në listë është Mamadou Sangare, mesfushor i lindur në vitin 2002, që aktivizohet te Lens dhe përfaqëson kombëtaren e Malit. Futbollisti po zhvillon një sezon shumë të mirë në Ligue 1 dhe për këtë arsye ka tërhequr vëmendjen e klubeve të mëdha si Mançester Junajtid dhe Çelsi, të cilat pritet të hyjnë në një garë për transferimin e tij në verë. Megjithatë, Juventusi nuk mbetet pas. Drejtuesi Komoli thuhet se po mendon të përshpejtojë lëvizjet për të mposhtur konkurrencën nga Premier League. Sangare, i cili më parë ka luajtur edhe me Hartberg dhe Rapid Vjenë, vlerësohet rreth 30 milionë euro.
OPENDA – Juventusi ngjitet në vendin e katërt në renditje falë fitores minimale në fushën e Atalantës dhe humbjes së Komos ndaj Interit. Vendimtar në Bergamo ishte sërish Boga, gjithnjë e më deciziv dhe pa dyshim blerja më e goditur e drejtimit të Komolit. Ndërkohë, ai që ka zhgënjyer më shumë është Lois Openda, i cili ka rënë ndjeshëm në hierarkinë sulmuese të Luçiano Spaletit. Sulmuesi belg ka dështuar të justifikojë pritshmëritë dhe deri tani ka shënuar vetëm 2 gola në 33 paraqitje me fanellën bardhezi. Ai nuk ka luajtur që nga 1 marsi, në ndeshjen ndaj Romës, ku hyri vetëm si zëvendësues në fund të takimit.
Në ndeshjet e fundit të kampionatit, Openda ka mbetur në stol dhe tashmë konsiderohet jashtë planeve të klubit për sezonin e ardhshëm. Megjithatë, ka ardhur edhe një zhvillim i rëndësishëm financiar, është aktivizuar detyrimi i blerjes për Opendan, i lidhur me arritjen e një pozicioni brenda top 10 në renditje nga Juventusi. Klubi bardhezi do të duhet të paguajë rreth 41 milionë euro, të cilave u shtohen mbi 3 milionë për huazimin e verës së kaluar. Së bashku me kostot shtesë, shifra totale shkon deri në rreth 46 milionë euro. Openda ka gjithashtu një pagë bruto pranë 8 milionë eurove, duke e çuar ndikimin total në bilancin e klubit në rreth 18 milionë euro për sezonin e ardhshëm.
Drejtuesit e Juventusit pritet të kërkojnë një zgjidhje për sulmuesin belg, por shitja e tij përfundimtare do të jetë e vështirë. Opsioni më i mundshëm mbetet huazimi me të drejtë ose detyrim blerjeje, me synimin për ta rilançuar lojtarin që ende ka interes nga Bundesliga dhe Ligue 1.
