Marash Kumbulla rikthehet në La Lig/ Mbrojtësi shqiptar huazohet sërish nga Roma

Marash Kumbulla do të vijojë karrierën në Spanjë. Mbrojtësi i Kombëtares shqiptare është prezantuar si lojtari më i ri i Rayo Vallecanos, duke siguruar rikthimin në La Liga për sezonin e tretë radhazi.

Kumbulla bashkohet me klubin madrilen në formën e huazimit nga Roma, deri në fund të sezonit. Për mbrojtësin shqiptar bëhet fjalë për një tjetër eksperiencë në kampionatin spanjoll, pas aventurave me Espanyolin dhe Mallorcën.

Rayo Vallecano e bëri zyrtar transferimin përmes njoftimit të klubit, ku konfirmoi se Kumbulla do të jetë pjesë e skuadrës në huazim nga Roma.

Për mbrojtësin 26-vjeçar, kalimi te Rayo sjell një tjetër mundësi për të fituar hapësira dhe për të vijuar karrierën në një kampionat që tashmë e njeh.

Megjithatë, për Kumbullën mbetet e njëjta situatë që është përsëritur në vitet e fundit. Edhe këtë herë nuk bëhet fjalë për një transferim përfundimtar, por për një huazim.

Roma vazhdon të jetë klubi që zotëron kartonin e mbrojtësit shqiptar, ndërsa prej disa sezonesh Kumbulla është larguar në huazim te skuadra të tjera, pa gjetur një zgjidhje të përhershme për të ardhmen e tij.

Pas eksperiencave në Spanjë me Espanyolin dhe Mallorcën, Kumbulla rikthehet në La Liga me Rayo Vallecanon. Tashmë objektivi i tij është të gjejë vazhdimësi në fushë dhe të fitojë një rol të rëndësishëm në skuadrën e re.

Kalimi në Madrid i jep edhe një tjetër mundësi mbrojtësit të Kombëtares shqiptare për të konsoliduar pozitat e tij në një nga kampionatet më të forta të Europës.