Mario Mitaj rikthehet në Europë, mbrojtësi shqiptar firmos me Xhenoan

Mario Mitaj është pranë rikthimit në futbollin europian. Mbrojtësi shqiptar pritet të prezantohet si lojtari më i ri i Xhenoas, pasi klubi italian ka arritur marrëveshjen për transferimin e tij nga Al Itihadi.

Marrëveshja mes palëve është konfirmuar edhe nga eksperti i merkatos, Fabricio Romano, ndërsa shifra që pritet të përfitojë klubi saudit raportohet të jetë rreth 5 milionë euro.

Në garën për shërbimet e Mitajt ishte edhe Porto, por në fund Xhenoa arriti të sigurojë firmën e mbrojtësit 22-vjeçar.

Ky transferim shënon rikthimin e Mitajt në Europë pas eksperiencës në Arabinë Saudite me Al Itihadin, ku ai regjistroi 58 paraqitje dhe fitoi edhe titullin kampion.

Pavarësisht suksesit me klubin saudit, sezoni i fundit ishte i vështirë për mbrojtësin shqiptar për shkak të kufizimeve për numrin e lojtarëve të huaj në kampionat, çka ndikoi në hapësirat e tij në skuadër.

Pas aventurave me AEK-un dhe Lokomotivën e Moskës, Mitaj tashmë pritet të nisë një kapitull të ri në Itali me Xhenoan, një nga klubet historike të Serisë A.