Kryetari i Partisë Demokratike, Sali Berisha, ka akuzuar kryeministrin Edi Rama se po ndërmerr veprime ndaj kryebashkiakut Erion Veliaj nga frika se m...
Hong Kongu ka përjetuar tetorin më të ngrohtë të regjistruar ndonjëherë, në një kohë kur fenomeni klimatik &ld...
SPORT
“Më zgjuan në agim për të blerë Napolin”/ Moratti zbulon ofertën që refuzoi më shumë se 20 vite më parë
PiranjatPërditësimi i fundit 3 September 2026, 11:50
Massimo Moratti ka zbuluar se më shumë se 20 vite më parë kishte mundësinë të blinte Napolin, pas falimentimit të klubit dhe rikthimit të tij në Serie C. Ish-presidenti i Interit rrëfen se e refuzoi mundësinë, pasi nuk dëshironte të drejtonte një klub tjetër pa i kushtuar kohën dhe pasionin e nevojshëm.
Në një intervistë për “Il Mattino”, Moratti tregon se në atë periudhë u kontaktua nga një president i Serie A, i cili i sugjeroi të investonte në jug dhe të merrte drejtimin e Napolit.
“Kur Napoli falimentoi dhe u desh të riniste nga Serie C, një president koleg i imi në Serie A më zgjoi thuajse në agim për të më thënë se ishte rasti im i madh për të investuar në jug, për të ringjallur atë klub historik”, rrëfen Moratti.
Ish-presidenti i Interit thotë se nuk pati dilema për ta refuzuar ofertën, pasi në atë kohë ishte i angazhuar me Interin.
“E njoh atë qytet, atë tifozeri dhe nuk mund të meritonin një president që të drejtonte Napolin pa i dedikuar të gjithë kohën e tij dhe pa pasion. Unë kisha Interin dhe nuk mund të shpërqendrohesha nga klubi tjetër”, u shpreh ai.
Në vend të Morattit, Napolin e mori Aurelio De Laurentiis, i cili e drejtoi klubin nga Serie C deri te titujt kampionë.
Moratti vlerëson mënyrën se si De Laurentiis e ndërtoi klubin dhe e ktheu në një projekt afatgjatë.
“De Laurentiis konvertoi një pasion në biznes. Unë nuk kam qenë kurrë i zoti, isha i dobët, nuk do t’ia dilja kurrë të mbyllja një sesion të merkatos pa blerë një futbollist të madh. Por ndoshta është ai që kuptoi vërtet sesi funksionon bota e futbollit”, tha Moratti.
Duke folur për Napolin, ai kujtoi edhe epokën e Diego Maradonës, por e veçoi punën e bërë nga De Laurentiis në ndërtimin e një klubi të qëndrueshëm.
“E admiroja Napolin e Maradonës, por ai nisi një cikël që nuk ishte i lidhur me futbollistët, por me një klub të shëndetshëm, afatgjatë dhe fitues”, u shpreh Moratti.
Moratti foli edhe për përballjen e ardhshme mes Interit dhe Napolit, ku trajnerët Cristian Chivu dhe Massimiliano Allegri do të përballen në San Siro. Ai vlerësoi të dy teknikët, duke veçuar Chivun për mënyrën se si menaxhon grupin.
“Allegri është një trajner i pjekur, drejton një prej skuadrave më të forta në Serie A dhe di si të fitojë. Chivu më befasoi për normalitetin me të cilin përballon çdo lloj situate që ndoshta nuk është normale. Është një person që di të mbajë grupin dhe ta bëjë veten ta duan”, tha ish-presidenti i Interit.
Moratti kujtoi edhe periudhën kur Chivu ishte futbollist dhe përmendi reagimin e tij pas një dëmtimi në kokë.
Në lidhje me merkaton, Moratti zgjodhi Nico Paz të Comos si një prej lojtarëve që nuk do të donte t’i shpëtonte, ndërsa foli edhe për largimin e Antonio Contes nga Napoli.
“Të mos kesh Conten në pankinë është një avantazh për konkurrencën dhe e bën luftën për titull më të ekuilibruar. Ai e mbyll sezonin ose në vendin e parë ose në të dytin”, u shpreh Moratti.
Ish-presidenti zikaltër foli edhe për Gian Piero Gasperinin, i cili po drejton Romën. Moratti vlerësoi futbollin e trajnerit, por kujtoi se eksperienca e tij te Interi nuk funksionoi.
“Gjithnjë i ka bërë skuadrat e tij të luajnë mirë, edhe kjo Romë është spektakolare teksa kërkon vazhdimisht topin në vertikal. Por me mua gjërat shkuan keq, ishte i pafat; nuk fitoi asnjë ndeshje as në miqësore”, tha Moratti.
