“Çmenduri” për sulmuesin e kombëtares, skuadra kryeqytetase gati të paguajë klauzolën prej 11 milionë euro

Çmenduria e merkatos së verës duket se mund të vijë nga Rusia. Sipas gazetarit rus Andrej Pankov, Spartaku i Moskës ka vendosur të aktivizojë klauzolën e largimit prej 11 milionë eurosh për të transferuar sulmuesin shqiptar Mirlind Daku nga Rubin Kazani.

Marrëveshja pritet të finalizohet nëse klubi moskovit dhe Daku arrijnë gjuhën e përbashkët për kushtet personale të kontratës. Duke marrë parasysh vlerën e lartë të klauzolës së prishjes së marrëveshjes me Rubin Kazanin, edhe paga dhe kontrata e re e sulmuesit pritet të jenë në nivele të konsiderueshme.

Daku është kthyer në një nga emrat më të kërkuar të kësaj merkatoje. Sulmuesi 28-vjeçar e ka nisur sezonin me gol te Rubin Kazani, ndërsa Spartaku i Moskës e ka ndjekur prej kohësh situatën e tij.

Interes për shërbimet e shqiptarit ka shfaqur edhe një tjetër klub i madh nga Moska, CSKA. Edhe ky klub raportohet se është gati të paguajë klauzolën prej 11 milionë eurosh për ta afruar Dakun.

Tashmë pritet të shihet se cili nga dy klubet e kryeqytetit rus do të arrijë të bindë sulmuesin shqiptar për të vazhduar karrierën e tij.