Milan në kërkim të “fantazistit”, pasi humbën Karetas, dy janë opsionet më të favorshme për kuqezinjtë

Milani vijon kërkimin për një fantazist të krahut të djathtë. Pas largimit të mundshëm të objektivit Karetsas drejt Borussia Dortmundit, klubi kuqezi ka kthyer menjëherë vëmendjen te alternativa të tjera për të plotësuar kërkesat taktike të trajnerit Ruben Amorim.

Me Christian Pulisic të konsoliduar në rolin e trekuartistit të majtë, Milani kërkon një profil të ngjashëm në krahun e djathtë të skemës 3-4-2-1: një lojtar kreativ, i aftë të luajë mes linjave, të krijojë raste, të sulmojë portën dhe të japë më shumë variacion në fazën ofensive.

Në krye të listës së drejtuesve kuqezi është Matias Soulé. Argjentinasi, pas eksperiencave me Juventusin, Frosinonen dhe Romën, ka vendosur të vazhdojë karrierën në Europë, duke refuzuar ofertat nga Arabia Saudite.

Soulé ka dhënë miratimin për projektin e Milanit, ndërsa edhe Ruben Amorim e vlerëson profilin e tij. Pengesa kryesore mbetet kërkesa ekonomike e Romës, e cila kërkon rreth 40 milionë euro. Milani nuk dëshiron të arrijë këtë shifër dhe po punon për të ulur çmimin e transferimit.

Një alternativë shumë e rëndësishme është edhe Franco Mastantuono. Talenti 18-vjeçar i Real Madridit pritet të largohet në huazim për të fituar eksperiencë, ndërsa Milani, së bashku me Romën dhe Fiorentinën, po monitoron situatën.

Megjithatë, kuqezinjtë nuk preferojnë një huazim të thjeshtë. Ideja është një marrëveshje në stilin e Brahim Diaz, me të drejtë blerjeje dhe një mundësi rikthimi për Real Madridin.

Në listën e Milanit figuron edhe një emër surprizë nga Premier League: Ethan Nwaneri, talenti 2007 i Arsenalit. Topçinjtë duan të ruajnë kontrollin mbi të ardhmen e tij, ndërsa interes për lojtarin kanë shfaqur edhe klube të tjera angleze.

Milani kërkon një trekuartist të djathtë për projektin e Amorimit dhe merkatoja do të vendosë nëse zgjedhja finale do të jetë Soulé, Mastantuono apo një tjetër talent i ri europian.