Ndahet nga jeta ish-boksieri Prichard Colón, 11 vite pas ndeshjes që i ndryshoi jetën

Ish-boksieri Prichard Colón ka ndërruar jetë në moshën 33-vjeçare, 11 vite pasi pësoi dëmtime të rënda dhe me pasoja të përhershme në kokë gjatë humbjes së vetme në karrierën e tij profesionale.

Lajmin e ka bërë të ditur babai i tij, Richard Colón, përmes një postimi në Facebook të enjten.

“Me keqardhje ju njoftoj për ndarjen nga jeta të djalit tim, Prichard, nga kjo botë”, shkroi ai, duke shtuar: “Tani ai është në një botë më të mirë”.

“Faleminderit për kaq shumë vite dashurie dhe lutjesh. Ju lutem, sa të mundeni, vazhdoni të na mbani në lutjet tuaja”, shtoi babai i ish-boksierit.

Një talent i madh i boksit

Colón lindi në Florida, por familja e tij u zhvendos në Porto Riko kur ai ishte fëmijë. Ai u shfaq shumë shpejt si një nga talentet më premtuese të boksit, duke fituar pesë tituj kombëtarë në kategoritë e të rinjve, si dhe medaljen e artë në Kampionatin Pan-Amerikan për të rinj, të gjitha para se të mbushte 20 vjeç.

Karriera e tij profesionale, të cilën e nisi në vitin 2013, ishte po aq mbresëlënëse. Në kategorinë super të mesme, Colón zhvilloi 17 ndeshje, duke fituar 16 prej tyre, 13 me nokaut.

Në shtator 2015, ai mposhti ish-kampionin e WBA-së, Vivian Harris, duke e nokautuar në raundin e katërt. Por vetëm një muaj më vonë, karriera e tij do të merrte një kthesë tragjike.

Ndeshja që ndryshoi gjithçka

Në tetor 2015, Colón, vetëm 23 vjeç në atë kohë, u përball me Terrel Williams në EagleBank Arena në Fairfax, Virginia.

Gjatë ndeshjes 10-raundëshe, ai pësoi disa goditje në kokë, përfshirë një goditje të paligjshme në pjesën e pasme të kokës. Sipas Reuters, promotori i ndeshjes, Lou DiBella, konfirmoi më pas se Colón kishte pësuar dëmtime gjatë përballjes.

Pamjet e ndeshjes, të publikuara online, treguan Williams duke e goditur Colón në pjesën e pasme të kokës në raundin e shtatë. Goditja e tronditi dukshëm boksierin, ndërsa Williams u ndëshkua për goditjen e paligjshme.

Colón u rrëzua dy herë në raundin e nëntë. Pas këtij raundi ai u skualifikua, pasi këndi i tij gabimisht hoqi dorezat, duke menduar se ndeshja kishte përfunduar. Pas përfundimit të duelit, Colón shfaqi shenja të traumës në kokë në dhomën e zhveshjes dhe u dërgua me urgjencë në spital. Atje iu nënshtrua një ndërhyrjeje kirurgjikale për të ulur presionin mbi trurin.

Ai mbijetoi, por dëmtimet e pësuara i dhanë fund karrierës së tij në boks. Në vitet që pasuan, babai i tij publikoi vazhdimisht foto të Prichardit në karrige me rrota.

WBC: Kampion i përjetshëm

Këshilli Botëror i Boksit (WBC) i ka bërë homazh Colón, duke e cilësuar atë një kampion të përjetshëm.Organizata shprehu dhimbjen për ndarjen e tij nga jeta dhe vlerësoi kontributin e tij në boks dhe lidhjen e fortë me Porto Rikon.

WBC kishte shpallur më herët Colón “Kampion Nderi të Botës” dhe i kishte dorëzuar rripin e famshëm Green and Gold, për të cilin organizata tha se ai “e meritonte gjithmonë”.

WBC theksoi gjithashtu se tragjedia e Colón ndikoi në forcimin e rregullave të sigurisë në boks, duke përfshirë zero tolerancë ndaj goditjeve në pjesën e pasme të kokës, të njohura si “rabbit punches”, si dhe protokolle më të rrepta mjekësore.

“Prehu në paqe, i dashur Prichard. Trashëgimia dhe buzëqeshja jote do të jetojnë përgjithmonë në zemrat tona”, thuhet në mesazhin e WBC.