“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
SPORT
Ndeshja me Sllovakinë, Kosova zhvillon stërvitjen e radhës
PiranjatPërditësimi i fundit 25 Mars 2026, 15:58
Kosova ka zhvilluar sot seancën e dytë stërvitore në kuadër të përgatitjeve për ndeshjen gjysmëfinale të “play-off”-it për kualifikim në Kupën e Botës 2026.
Atmosfera në kampin e Dardanëve ka qenë sërish shumë pozitive, me futbollistët që kanë treguar përkushtim maksimal dhe disiplinë të lartë në zbatimin e detyrave taktike të përzgjedhësit Franco Foda. Ekipi po punon me intensitet të lartë, i vetëdijshëm për rëndësinë e sfidës që e pret.
Stërvitja e fundit para përballjes me Sllovakinë do të zhvillohet nesër në orën 11:00 në stadiumin “Fadil Vokrri”, ndërsa më pas Kombëtarja do të udhëtojë drejt Bratisllavës, ku të enjten zhvillohet ndeshja e shumëpritur.
Në prag të këtij dueli, mbrojtësi Florent Hadërgjonaj ka theksuar se skuadra është maksimalisht e motivuar për këtë sfidë historike.
“Për të gjithë ne kjo është një ndeshje historike. Kemi mundësinë të arrijmë në finale dhe të afrohemi edhe më shumë me Botërorin. Jemi të motivuar maksimalisht dhe të fokusuar te kjo ndeshje. Atmosfera në ekip është fantastike dhe kjo na jep forcë shtesë”, ka thënë Hadërgjonaj.
Ai ka shtuar se grupi është i bashkuar dhe kjo reflektohet në fushë, ku secili futbollist lufton për njëri-tjetrin.
“Kualifikimi në Botëror është një ëndërr e jashtëzakonshme. Kemi pasur një shans për Evropian dhe tani kemi një tjetër për Botëror. Jemi të fokusuar vetëm te gjysmëfinalja dhe besojmë se mund ta kalojmë këtë pengesë”, është shprehur ai.
Në anën tjetër, mbrojtësi Kreshnik Hajrizi është shprehur optimist para kësaj përballjeje, duke theksuar se ekipi është përgatitur maksimalisht.
“Stërvitjet po shkojnë shumë mirë. E dimë rëndësinë e ndeshjes dhe faktin që mund të shkruajmë histori. Kemi besim dhe shpresojmë në fitore”, ka thënë Hajrizi.
Ai ka theksuar se, pavarësisht vështirësive që sjell ndeshja në udhëtim, Kosova ka dëshmuar edhe më parë se di të përballet me sfida të tilla.
“Ëndrra për Botëror po afrohet. Jemi vetëm dy ndeshje larg. Është një sfidë shumë e rëndësishme dhe jemi të gatshëm të japim maksimumin”, ka përfunduar ai.
Ndeshja ndërmjet Kosovës dhe Sllovakisë zhvillohet të enjten në Bratisllavë, derisa fituesi i këtij dueli do të përballet në finale me fituesin e ndeshjes Turqi –Rumani.
