Ndryshe nga Botërori, Anglia rrezikon të mbetet jashtë "Euro 2028" edhe pse është organizatore

Anglia do të duhet të kualifikohet për Euro 2028, pavarësisht se është një nga vendet organizatore – ndryshe nga Argjentina, e cila tashmë ka siguruar një vend në Botërorin e ardhshëm.

Ndërsa miliona tifozë kanë firmosur një peticion për të përjashtuar kampionët e botës të vitit 2022, Argjentinën, nga turnetë e ardhshëm, shumë prej tyre janë zemëruar kur mësuan se skuadra e teknikut Lionel Scaloni e ka tashmë të garantuar pjesëmarrjen pas katër vitesh. Dhe kjo ndodh edhe pse Argjentina do të organizojë vetëm një ndeshje.

Spanja, Portugalia dhe Maroku, organizatorët e Kupës së Botës 2030, kanë marrë automatikisht një vend në turne. Por edhe më polemike është fakti që Argjentina, Uruguaji dhe Paraguaji kanë siguruar gjithashtu pjesëmarrjen vetëm sepse do të organizojnë ndeshjet hapëse në vendet e tyre për edicionin e 100-vjetorit të Kupës së Botës.

Ndërkohë, Anglia – që do të presë skuadra nga e gjithë Europa në Euro 2028 me 24 ekipe – nuk e ka ende të garantuar pjesëmarrjen në turneun që organizon vetë.

Ndeshjet do të zhvillohen në Wembley, Tottenham Hotspur Stadium, Etihad Stadium, Hill Dickinson Stadium të Evertonit, St James’ Park dhe Villa Park. Zakonisht, vendet organizatore të turneve ndërkombëtare kualifikohen automatikisht, ashtu si SHBA, Kanadaja dhe Meksika për Kupën e Botës së kësaj vere.

Por rregullat e reja të UEFA-s për kualifikueset bëjnë që Anglia të jetë pjesë e njërit prej 12 grupeve me katër ose pesë skuadra, së bashku me 50 kombëtaret e tjera për Euro 2028, pa përfituar trajtim të veçantë. Gjithashtu, ajo nuk do të jetë në të njëjtin grup me Skocinë, Uellsin dhe Republikën e Irlandës, të cilat gjithashtu do të organizojnë ndeshje.