Neymar humb qetësinë pas ndeshjes, përplasje dhe provokime në stadium

Neymar është bërë protagonist i një incidenti pas përfundimit të ndeshjes mes Santos dhe Remo, e vlefshme për Kupën e Brazilit. Pas fitores 1-0, që i siguroi Santos kualifikimin në çerekfinale, sulmuesi brazilian u përfshi në një debat të ashpër me drejtues dhe anëtarë të stafit të klubit kundërshtar.

Pamjet filmike tregojnë Neymar duke u përballur me përfaqësues të Remo në zonën e hyrjes së stadiumit Mangueirão, menjëherë pas vërshëllimës përfundimtare. Shkaku i konfliktit nuk është bërë i ditur, por mes palëve pati britma, fyerje dhe provokime, ndërsa futbollisti reagoi me gjeste dhe ofendime.

Situata tërhoqi vëmendjen e lojtarëve dhe stafit të të dyja skuadrave, të cilët u afruan për të kuptuar se çfarë po ndodhte. Në pamje shihet edhe sulmuesi Gabigol, i cili vëzhgonte i habitur zhvillimet nga distanca.

Tensionet u shtuan edhe më shumë kur disa tifozë dhe zyrtarë të Remo rrëzuan barrierat pranë zonës së dhomave të zhveshjes, ndërsa sigurimi i Santos ndërhyri për të qetësuar situatën.

Gjatë gjithë ndeshjes, Neymar ishte objekt i fishkëllimave dhe fyerjeve nga tifozët vendas. Pas përfundimit të takimit, ai iu përgjigj duke i provokuar me thirrjen: "Të eliminuar!", duke e përsëritur disa herë në drejtim të tribunave.