Nga akademia në ekipin e parë, pesë lojtarë debutojnë me Tiranën

Tirana ka treguar një vëmendje të veçantë ndaj talenteve të akademisë gjatë këtij sezoni, duke u dhënë mundësinë disa futbollistëve të rinj të provojnë emocionet e ekipit të parë.

Plot pesë lojtarë të akademisë bardheblu kanë regjistruar debutimin e tyre në një sfidë miqësore ndaj Çorumit, skuadër që militon në elitën e futbollit turk.

Trajneri Klafuriç vendosi t’i aktivizojë të rinjtë, duke u dhënë atyre mundësinë për të treguar vlerat e tyre në një përballje të nivelit ndërkombëtar.

Bëhet fjalë për Mateo Macin, Leon Misjan, Aimar Bamin, Olti Qerimajn dhe Serxho Prendin, të cilët përjetuan një moment të veçantë në karrierën e tyre, duke hedhur hapat e parë me fanellën e ekipit të parë të Tiranës.

Ndeshja ndaj Çorumit u mbyll me rezultatin e barabartë 0-0, por për klubin kryeqytetas rezultati sportiv u shoqërua me një tjetër arritje të rëndësishme: promovimin e talenteve të rinj nga akademia.