Deputetja e Partisë Demokratike, Jorida Tabaku, ka reaguar përmes një postimi në rrjetet sociale duke u shprehur se kryeministri Edi Rama ...
SPORT
Sfida Brazil-Japoni rikthen në jetë përballjen ikonike të “Oli dhe Benxhi”
PiranjatPërditësimi i fundit 29 Qershor 2026, 09:49
Për miliona tifozë të futbollit që janë rritur me animen dhe mangën legjendare “Captain Tsubasa”, e njohur në Shqipëri si “Oli dhe Benxhi”, sfida e sotme mes Japonisë dhe Brazilit në Kupën e Botës 2026 duket si një ëndërr e kthyer në realitet.
Dy kombëtaret do të përballen në raundin e 1/16-ave në Houston, duke sjellë në fushë një histori që për dekada ekzistonte vetëm në botën e imagjinatës.
Brazili ka qenë gjithmonë sfida më e madhe për heroin Oliver Harton (Tsubasa Ozora) dhe vendi që përfaqësonte majën e futbollit botëror.
Autori i “Captain Tsubasa”, Yoichi Takahashi, u frymëzua nga Kupa e Botës e vitit 1978 në Argjentinë për të krijuar historinë që do të revolucionarizonte futbollin japonez. Kur manga u publikua për herë të parë në vitin 1981, Japonia nuk ishte kualifikuar kurrë në një Botëror dhe as nuk kishte një kampionat profesionist futbolli.
Megjithatë, Takahashi krijoi një univers ku futbollistët japonezë sfidonin pa frikë kombëtaret më të mëdha të planetit. Në qendër të kësaj historie ishte pikërisht Brazili, vendi ku Oli zhvillohej si futbollist nën drejtimin e mentorit të tij brazilian Roberto Hongo, përpara se të udhëhiqte Japoninë drejt finales së Kampionatit Botëror të të Rinjve.
“Captain Tsubasa”, ose siç njihet nga publiku shqiptar “Oli dhe Benxhi”, nuk mbeti vetëm një manga apo anime. Ajo frymëzoi breza të tërë fëmijësh japonezë të merreshin me futboll dhe luajti një rol të rëndësishëm në rritjen e popullaritetit të sportit në Japoni, përpara krijimit të kampionatit profesionist J.League në vitin 1993. Sot, FIFA e njeh veprën si një nga fenomenet kulturore që ndikoi në zhvillimin e futbollit japonez.
Nga fantazia në realitet, Japonia ka bërë një rrugëtim të jashtëzakonshëm. Ajo u kualifikua për herë të parë në një Kupë Bote në vitin 1998 dhe që atëherë ka marrë pjesë në çdo edicion, ndërsa futbollistët japonezë janë bërë pjesë e klubeve më të mëdha evropiane.
Madje, japonezët kanë provuar tashmë se mund ta mposhtin Brazilin. Në tetor të vitit 2025, ata përmbysën rezultatin nga 0-2 në 3-2 në një ndeshje miqësore në Tokio, duke regjistruar fitoren e parë historike ndaj “Seleçaos”. Rastësisht, rezultati përfundimtar ishte pikërisht 3-2, i njëjti me fitoren imagjinare të Japonisë ndaj Brazilit në “Captain Tsubasa”.
Sot historia shkruhet në një skenë shumë më të madhe. Brazili mbetet favorit për të kaluar më tej, por Japonia hyn në fushë me bindjen se mund të sfidojë një nga kombëtaret më të mëdha të historisë. Nuk do të ketë Oliver Harton, Carlos Santana apo Natureza në stadiumin e Houstonit, por futbollistët e vërtetë kanë mundësinë të shkruajnë kapitullin e tyre.
Për fansat e “Oli dhe Benxhi”, kjo nuk është thjesht një ndeshje e Kupës së Botës. Është momenti kur një ëndërr që lindi mbi 40 vite më parë në faqet e një manga japoneze takohet me realitetin.
