Norvegjia përgatit ankesë në FIFA/ Pretendon ndërhyrje të Trumpit në vendimin disiplinor të Botërorit

Federata Norvegjeze e Futbollit pritet të paraqesë një ankesë zyrtare në Komitetin e Etikës së FIFA-s për një vendim disiplinor gjatë Kupës së Botës 2026, duke pretenduar se është ndikuar nga faktorë të jashtëm.

Çështja lidhet me sulmuesin amerikan Folarin Balogun, i cili u ndëshkua me karton të kuq në ndeshjen ndaj Bosnjë-Hercegovinës, por më pas FIFA vendosi të shtyjë zbatimin e pezullimit të tij për 12 muaj, duke i lejuar të luante në sfidën ndaj Belgjikës.

Vendimi shkaktoi reagime nga Federata Belge dhe UEFA, të cilat e cilësuan masën si të pajustifikueshme dhe një precedent problematik për rregullat e futbollit.

Presidentja e Federatës Norvegjeze, Lise Klaveness, deklaroi se FIFA duhet të pranojë se ka gabuar në trajtimin e rastit dhe ngriti shqetësime për ndikimin e faktorëve politikë në vendimmarrje.

Debati u shtua pasi presidenti amerikan Donald Trump pranoi se kishte kontaktuar kreun e FIFA-s, Gianni Infantino, për çështjen e Balogunit.

“Kur ndryshon një rregull në këtë mënyrë, futesh në një terren të rrezikshëm që mund ta vendosë në rrezik të gjithë futbollin”, tha Klaveness.

Federata norvegjeze pritet ta diskutojë çështjen në organet drejtuese të saj dhe më pas ta dërgojë zyrtarisht pranë institucioneve përkatëse të FIFA-s.