Olise i thotë “po” transferimit te Reali, por duhet bindur Bayerni

Ylli francez Michael Olise e ka bërë të qartë se prioriteti i tij për të ardhmen është një transferim te Real Madridi. Sipas të përditshmes prestigjioze franceze L’Équipe, sulmuesi nuk është i interesuar për ofertat që vijnë nga klubet angleze gjatë kësaj merkatoje verore.

Raporti thekson se Olise e konsideron Real Madridin si klubin më të madh në botë dhe beson se veshja e fanellës së “Los Blancos” do të ishte hapi ideal në karrierën e tij. Për këtë arsye, ai e sheh klubin spanjoll si destinacionin e vetëm që dëshiron të ndjekë në këtë moment.

Sipas burimeve të gazetës franceze, futbollisti u ka bërë të ditur njerëzve të afërt dëshirën e tij për t’u transferuar sa më shpejt te gjiganti madrilen.

Megjithatë, realizimi i kësaj lëvizjeje nuk pritet të jetë i lehtë. Presidenti i Real Madridit, Florentino Pérez, vlerëson potencialin e Olise, por Bayern Munich nuk ka ndërmend të heqë dorë nga shërbimet e tij gjatë kësaj vere.

Klubi bavarez e konsideron francezin një pjesë të rëndësishme të projektit dhe, duke qenë se ai ka një kontratë afatgjatë, çdo tentativë e Real Madridit do të kërkojë negociata të vështira mes dy klubeve.