Pamje e rrallë në Formula 1! Presidenti çek la protokollin, u shfaq si fotograf në Çmimin e Madh të Hungarisë

Një moment krejtësisht i pazakontë jashtë pistës tërhoqi vëmendjen gjatë Çmimit të Madh të Hungarisë në Formula 1. Presidenti i Republikës Çeke, Petr Pavel, u shfaq në paddock jo si i ftuar VIP apo spektator, por si fotograf i akredituar, i pajisur me kamerë profesionale dhe leje zyrtare të FIA-s.

Kreu i shtetit çek ndoqi nga afër seancat stërvitore dhe kualifikuese të së shtunës, duke fotografuar makinat dhe pilotët pranë fotografit të njohur të Formula 1, Jiří Krenek.

Megjithatë, kjo nuk është hera e parë që Pavel lë mënjanë rolin e presidentit për t'iu përkushtuar pasionit të tij për fotografinë. Vetëm pak javë më parë ai ishte i pranishëm edhe në garën legjendare 24 Orët e Le Mans, ku dokumentoi nga afër ngjarjen me aparatin e tij profesional.

Ish-kryetari i Komitetit Ushtarak të NATO-s njihet si një adhurues i madh i sporteve motorike. Gjatë viteve ai ka fotografuar gara të MotoGP dhe World Superbike në Brno, ndërsa ka udhëtuar edhe në Shtetet e Bashkuara dhe Arabinë Saudite për të ndjekur nga afër evente të mëdha si NASCAR dhe Rally Dakar.

Prania e tij në Hungaroring me kamerë në duar u bë një nga momentet më të komentuara të fundjavës së Formula 1, duke dëshmuar se pas detyrës së presidentit fshihet një pasion i veçantë për fotografinë dhe sportet motorike.