Studentët kanë marshuar sot në rrugët e Tiranës, ndërsa janë ndalur te Fakulteti i Ekonomikut, ku iu kanë bërë...
SPORT
Pas 28 vitesh mbyllet historia/ Piero Ausilio dhe Interi "ndajnë rrugët", zbulohet kush pritet ta zëvendësojë
PiranjatPërditësimi i fundit 3 September 2026, 16:20
Pas 28 vitesh, Piero Ausilio dhe Interi kanë ndarë rrugët.
Drejtori sportiv largohet nga klubi zikaltër pas pamundësisë për të gjetur marrëveshjen për rinovimin e kontratës, duke mbyllur një nga bashkëpunimet më të gjata në futbollin italian.
Interi i kishte propozuar Ausilios një zgjatje njëvjeçare të kontratës, ndërsa drejtori sportiv kërkonte një marrëveshje të paktën dyvjeçare.
Palët nuk gjetën gjuhën e përbashkët dhe në fund u vendos ndërprerja e menjëhershme e bashkëpunimit.
Ausilio e mbyll eksperiencën e tij te Interi pas një rrugëtimi që nisi në sektorin e të rinjve dhe vijoi deri në drejtimin sportiv të ekipit të parë.
Në vitin 2014 ai mori detyrën e drejtorit sportiv dhe gjatë kësaj periudhe Interi fitoi 3 tituj kampionë, 3 Kupa Italie dhe 3 Superkupa.
Në vitet e fundit, Ausilio ka qenë pjesë e shumë prej operacioneve të rëndësishme të merkatos së Interit.
Mes lojtarëve të afruar gjatë kësaj periudhe janë Lautaro Martínez, Nicolò Barella, Alessandro Bastoni dhe Marcus Thuram.
Për momentin, vendin e Ausilios pritet ta marrë Dario Baccin, bashkëpunëtor i tij prej vitesh.
Largimi i drejtorit sportiv është komentuar edhe nga kapiteni i Interit, Lautaro Martínez. Argjentinasi shprehu keqardhje për ndarjen dhe kujtoi rolin që Ausilio pati në transferimin e tij te klubi.
“Më vjen shumë keq. Ishte ai që më dha besim dhe më bëri të besoja te projekti. Do t’i jem gjithmonë mirënjohës”, tha Lautaro.
Kapiteni foli edhe për të ardhmen e tij te Interi, në një kohë kur është raportuar për interesimin e Barcelonës. Martínez e bëri të qartë dëshirën për të vazhduar në Milano.
“Do të qëndroja këtu përgjithmonë. Për sa kohë që më duan dhe i shërbej kësaj skuadre, do të jem këtu”, u shpreh kapiteni zikaltër.
