Ajo që nisi si një protestë kundër ndërtimit të një resorti luksoz bregdetar në një zonë të mbrojtur &n...
SPORT
“Peshku qelbet nga koka”/ Ish-kreu i FSHF sulmon FIFA-n: Institucion i korruptuar, Infantino duhet të largohet
PiranjatPërditësimi i fundit 7 Korrik 2026, 11:47
Ish-presidenti i Federata Shqiptare e Futbollit, Edmond Spaho, ka reaguar ashpër ndaj vendimeve të arbitrave në ndeshjet e fundit të FIFA World Cup 2026, duke ngritur akuza të forta ndaj FIFA për standarde të dyfishta dhe mungesë integriteti në garë.
Në një reagim të gjatë në rrjetet sociale, Spaho kritikoi mënyrën e menaxhimit të arbitrimit dhe drejtoi akuza edhe ndaj presidentit të FIFA-s, Gianni Infantino, për të cilin kërkoi largimin nga drejtimi i institucionit.
Duke iu referuar ndeshjes Anglia-Meksika, Spaho pretendoi se vendimet e gjyqtarëve ndikuan në rrjedhën e takimit dhe kritikoi faktin që FIFA pranoi më vonë disa gabime arbitrale.
“FIFA, e kryesuar nga Gianni Infantino, i kërkon ndjesë Anglisë pasi vendimet e marra nga arbitri rezultuan të gabuara. Por nëse Anglia do të ishte eliminuar, sa do të vlente ky kërkim faljeje?”, shkroi ai në reagimin e tij.
Ish-kreu i FSHF-së ngriti pikëpyetje edhe për rolin e shefit të arbitrave në FIFA, Pierluigi Collina, duke kritikuar përzgjedhjen e gjyqtarëve për ndeshje të rëndësishme të turneut.
Spaho komentoi gjithashtu vendime të tjera të diskutueshme gjatë Botërorit, përfshirë anulimin e kartonit të kuq ndaj sulmuesit amerikan Balogun dhe raste të tjera që, sipas tij, kanë dëmtuar besueshmërinë e kompeticionit.
“Peshku qelbet nga koka. FIFA është një institucion tërësisht i korruptuar. I pari që duhet të largohet për dëmet që po i shkakton futbollit është Gianni Infantino”, u shpreh ai.
Akuzat e Spahos vijnë në një periudhë kur arbitrimi dhe përdorimi i sistemit VAR kanë qenë në qendër të debateve gjatë Botërorit, me disa vendime që kanë shkaktuar reagime të forta nga skuadrat, tifozët dhe figura të njohura të futbollit.
