Plani për privatizimin e Botërorit, 55 federatat e UEFA dalin me deklaratë të përbashkët: Nuk do të marrim pjesë në kompeticionet e FIFA-s

Në deklaratë, UEFA thekson se Kupa e Botës përfaqëson një nga trashëgimitë më të rëndësishme të futbollit botëror dhe se e ardhmja e saj nuk mund të vihet në shërbim të interesave financiare.

Deklaratë në emër të UEFA-s dhe 55 federatave të saj kombëtare

UEFA dhe federatat e saj kombëtare nuk do të marrin pjesë në kompeticionet e FIFA-s

UEFA dhe 55 federatat e saj anëtare qëndrojnë të bashkuara. Ne e refuzojmë njëzëri dhe pa asnjë ekuivok propozimin e FIFA-s për të transferuar interesa pronësie mbi Kupën e Botës dhe kompeticione të tjera të FIFA-s tek investitorët privatë.

Kupa e Botës nuk mund të trajtohet si një produkt investimi. Ajo është një nga trashëgimitë më të mëdha sportive të futbollit. Është ndërtuar ndër breza nga futbollistët, ekipet kombëtare dhe tifozët në çdo kontinent. Asnjë pjesë e saj nuk duhet t’u dorëzohet investitorëve privatë. Kupa e Botës nuk është në shitje.

Është e papërgjegjshme dhe e pajustifikueshme që një propozim me një rëndësi kaq të madhe për futbollin të jetë hartuar në fshehtësi dhe të jetë sjellë pranë miratimit pa asnjë konsultim domethënës me ata që kanë përgjegjësinë për të administruar dhe zhvilluar lojën. Kjo nuk përbën vetëm një dështim të thellë të lidershipit, por edhe një shmangie të FIFA-s nga detyrimi i saj si kujdestarja e futbollit botëror.

Federatat kombëtare në mbarë botën po përballen tashmë me një ultimatum: ose të pranojnë kalimin e pakthyeshëm të kompeticioneve më të rëndësishme të futbollit nën kontrollin e interesave private, ose të përballen me pasojat. Ky nuk është një “vendim demokratik”, por një model qeverisjeje përmes intimidimit – një akt presioni që nuk i shkon për shtat një institucioni të ngarkuar me përgjegjësinë për administrimin e futbollit botëror.

Megjithatë, kundërshtimi ynë shkon shumë përtej mënyrës se si është ndjekur procesi.

Në momentin që investitorët e jashtëm fitojnë interesa pronësie në kompeticionet e FIFA-s, futbolli ndryshon përgjithmonë. Kthimi financiar i investimit bëhet një detyrim i përhershëm. Pritshmëritë e investitorëve shndërrohen në një presion të përditshëm. Që nga ai moment, çdo vendim për kalendarin ndërkombëtar, çdo vendim për formatin e kompeticioneve dhe çdo vendim që përcakton të ardhmen e futbollit nuk do të udhëhiqet më nga ajo që i shërben më mirë lojës, por nga ajo që i shërben më mirë aksionarëve.

Ky model nuk ka vend në futbollin botëror. E ardhmja e futbollit nuk mund të diktohet nga pritshmëritë e atyre, detyra kryesore e të cilëve është të maksimizojnë fitimin financiar. Po ashtu, interesat e federatave kombëtare, ligave, klubeve, futbollistëve dhe tifozëve nuk mund të vendosen në plan të dytë përballë kthimit financiar të investitorëve. Futbolli nuk mund të hipotekojë të ardhmen e tij për përfitime ekonomike.

Qëndrimi i Evropës është i qartë. Ne nuk do t’i japim kurrë legjitimitetin tonë këtij modeli. Askush nuk ka autoritetin moral të shesë diçka që vetëm e mban në besim për brezin e ardhshëm.

Si rezultat i diskutimeve të sotme, asnjë përfaqësuese kombëtare e federatave anëtare të UEFA-s nuk do të marrë pjesë në asnjë kompeticion të FIFA-s për sa kohë që këto propozime mbeten në fuqi, përveç rastit kur ky propozim të jetë tërhequr plotësisht dhe të jenë dhënë garanci detyruese se FIFA nuk do ta hapë më kurrë qeverisjen apo kompeticionet e saj ndaj pronësisë private.

Askush nuk duhet të ketë asnjë dyshim: UEFA dhe federatat e saj kombëtare do t’i kundërshtojnë këto plane me vendosmëri absolute.

Ka momente kur institucionet gjykohen jo nga ajo që janë të gatshme të pranojnë, por nga ajo për të cilën refuzojnë të bëjnë kompromis. Ky është një prej atyre momenteve.

Ka gjëra që janë thjesht tepër të rëndësishme për t’u shitur. Kupa e Botës e FIFA-s i përket futbollit. Gjithmonë i ka përkitur futbollit. Dhe për sa kohë Evropa do të ketë një zë, ajo nuk do të jetë kurrë në shitje.