Portieri i PSG-së rrëzohet gjatë nxehjes/ Merr ndihmën e stafit mjekësor, më pas luan ndaj Lilës

Momente shqetësuese u regjistruan pak para nisjes së ndeshjes mes PSG-së dhe Lilës, ku portieri Matvei Safonov u rrëzua në fushë gjatë nxehjes pas një përplasjeje.

Gardiani rus u përplas me trajnerin e portierëve të PSG-së dhe më pas ra në tokë. Safonov qëndroi për disa minuta në fushë, ndërsa pranë tij shkoi menjëherë stafi mjekësor i klubit francez.

Incidenti ndodhi vetëm pak çaste para fillimit të sfidës, duke ngritur shqetësime për gjendjen e portierit dhe nëse ai do të mund të luante.

Megjithatë, Safonov u rikthye në fushë dhe u vendos mes shtyllave që nga minuta e parë ndaj Lilës.

Ndeshja përfundoi në barazim 2-2, me portierin rus që e nisi dhe e zhvilloi takimin pavarësisht incidentit të ndodhur gjatë ngrohjes.