Presioni i UEFA-s, Gianni Infantino bën një hap pas, anulohet projekti “FIFA Forward Enterprise”

Presidenti i FIFA-s, Gianni Infantino, ka bërë një hap pas, duke tërhequr zyrtarisht projektin “FIFA Forward Enterprise”, një nismë që kishte ndezur debate të forta në futbollin ndërkombëtar.

Projekti parashikonte krijimin e një kompanie të re për administrimin e të drejtave tregtare, licencave dhe organizimit të kompeticioneve globale, përfshirë edhe Kupën e Botës, me mundësinë e përfshirjes së investitorëve privatë.

Fillimisht, Infantino e kishte prezantuar këtë plan si një mundësi për të rritur të ardhurat e FIFA-s dhe për të siguruar më shumë mbështetje financiare për 211 federatat anëtare. Megjithatë, propozimi hasi në kundërshtime të forta nga UEFA, Konfederata Aziatike e Futbollit, konfederata të tjera kontinentale, si dhe nga disa drejtues brenda vetë FIFA-s.

Përballë këtyre kundërshtimeve, FIFA vendosi të mos e çojë më tej projektin. Në deklaratën zyrtare, organizata thekson se pas konsultimeve me palët e interesuara, u arrit në përfundimin se iniciativa kishte krijuar përçarje të mëdha dhe nuk i shërbente më objektivit kryesor: bashkimit dhe zhvillimit të futbollit në nivel global.

Në përfundim të deklaratës së tij, kreu i FIFA-s u shpreh se fokusi i tij tashmë do të jetë rikthimi i dialogut dhe bashkëpunimit mes të gjitha palëve, me synimin për të vazhduar zhvillimin e futbollit në mbarë botën.

Vendimi është pritur pozitivisht nga institucionet kryesore të futbollit ndërkombëtar. Presidenti i Konfederatës Aziatike, Sheikh Salman bin Ebrahim Al Khalifa, përshëndeti tërheqjen e projektit, duke theksuar se vendime të kësaj rëndësie duhet të mbështeten gjithmonë në transparencë dhe konsultim të gjerë.

Me tërheqjen e FIFA Forward Enterprise, mbyllet një nga debatet më të forta që ka përfshirë drejtimin e futbollit botëror në muajt e fundit.