Rafael Leao drejt largimit nga Milani, arrihet marrëveshja me Galatasarayn për 45 milionë euro

Rafael Leao duket se është shumë pranë mbylljes së aventurës së tij me Milanin. Sulmuesi portugez pritet të largohet nga kuqezinjtë pas shtatë sezonesh dhe të vazhdojë karrierën në Turqi, te Galatasaray.

Sipas raportimeve, Leao ka arritur marrëveshje me kampionët e Turqisë, ndërsa Galatasaray pritet të paguajë rreth 45 milionë euro për kartonin e tij.

Për 27-vjeçarin kishte interes edhe nga Premier League. Aston Villa ishte një prej klubeve që kërkonte shërbimet e tij, por Leao mësohet se e ka refuzuar këtë mundësi, duke zgjedhur transferimin në Stamboll.

Sulmuesi pritet të udhëtojë drejt Turqisë për t’iu nënshtruar testeve mjekësore. Nëse gjithçka shkon sipas planit, më pas do të vijë edhe firma mbi kontratën që do ta bëjë zyrtarisht futbollist të Galatasarayt.

Një transferim i tillë do t’i jepte fund një aventure të gjatë të Leaos në Milano. Portugezi iu bashkua kuqezinjve në vitin 2019 dhe gjatë viteve u shndërrua në një nga lojtarët kryesorë të skuadrës.

Tashmë pritet konkretizimi i marrëveshjes dhe zyrtarizimi i transferimit, me Galatasarayn që është pranë një goditjeje të rëndësishme në merkato.