Bojkoti i mësimit në Universitetin “Fan S. Noli” në Korçë pritet të vijojë, pasi shumica e studentë...
SPORT
Rama propagandë me rezultatin e peshëngritësit, Erkand Qerimaj e nxjerr ‘blof’: Boll më! Sportistët nuk janë dekor
PiranjatPërditësimi i fundit 23 April 2026, 08:59
Kryeministri Edi Rama përmes një postimi në rrjetet sociale ka uruar peshëngritësin Briken Calja për rezultatet e arritura në kampionatin europian në Batumi, Gjeorgji.
“Një sukses i merituar që ngre lart flamurin shqiptar në arenën ndërkombëtare. Në Kampionatin Europian në Batumi, Gjeorgji, kampioni ynë Briken Calja shkëlqen duke u shpallur: Kampion Europe në stilin e shtytjes, Nënkampion Europe në dygarësh, kategoria 79 kg”, shkruan Rama.
Por pas këtij urimi ka qenë i menjëhershëm reagimi i sportistit Erkand Qerimaj i cili ka shprehur pakënaqësitë e tij. Erkand Qerimaj shpjegon se ka realizuar me sukses stilin e shkëputjes me 152kg, teksa ishte shumë pranë rekordit evropian, me 157kg.
Ndërkohë që në shtytje, peshëngritësi kuqezi s’ka ngritur pak, por 184 kg, e cila sipas tij ishte provë e pastër, madje me 3 të bardha nga gjyqtarët. Por Qerimaj tregon si u penalizua nga juria, e cila vendosir që ta anulonte për një lëkundje, e cila sipas tij ishte minimale.
Kjo ka mjaftuar që shkodrani të “shpërthejë”, duke e cilësuar këtë vendim ndaj tij si padrejtësi të madhe. Ndër të tjera, Qerimaj thekson se sportistë nuk janë dekor për foto dhe propagandë, një “thumb” direkt për drejtuesit e Federatës së Peshëngritjes dhe qeverisë.
Reagimi i Erkand Qerimaj
Sapo përfundova garën në Kampionatin Europian dhe këtë herë ama do flas pa filtra! Në shkëputje realizova 152 kg dhe tentova rekordin e Europës me 157 kg. Isha shumë pranë. Në shtytje realizova 184 kg – provë e pastër, e dhënë me 3 të bardha nga gjyqtarët. Më pas, juria vendos ta anullojë për një lëkundje minimale. Ky nuk është thjesht një vendim – është një padrejtësi e pastër dhe e turpshme që i bëhet një sportisti në mes të Europës.
Por edhe më e rëndë se kjo është heshtja. Drejtuesit e federatës ishin aty, me lekët e taksapaguesve, dhe nuk patën as guximin minimal për të mbrojtur sportistin e tyre. Asnjë reagim. Asnjë protestë. Asnjë qëndrim. Kjo nuk është papërgjegjshmëri por kjo është dështim.
Kur marrim medalje, jeni të parët për foto dhe deklarata. Kur ndodh padrejtësia, zhdukeni. Kjo është hipokrizi e pastër. Jemi i vetmi ekip në Europë që dalim pa uniforma dinjitoze. Pa fizioterapist. Pa mjek. Pa asnjë standard bazë që çdo shtet serioz e konsideron minimum. Dhe pastaj flasim për “rrugën drejt Europës”? Kjo është skandaloze.
Fondet? Vijnë çdo vit. Askush nuk jep llogari. Askush nuk tregon ku shkojnë. Kam kërkuar auditim , zero përgjigje. Kjo federatë sillet si pronë private, jo si institucion që duhet t’i shërbejë sportistëve dhe trajnerëve. STOP më me heshtje. BOLL më me abuzim. Sportistët nuk janë dekor për foto dhe propagandë, janë ata që mbajnë peshën reale të perfaqesimit Sportiv mbi supe. Dhe kjo që po ndodh nuk është thjesht problem është turp.
